Барои дастгирии иқтисоди ҷумҳурӣ дар шароити буҳрон, Тоҷикистон аз Хазинаи байнулмилалии асъор (ХБА) ҳудуди 500 млн. доллари ИМА маблағ дархост карданист. Дар ин бора газетаи
Financial Times
хабар медиҳад.
Дар мусоҳиба ба нашрия муовини раиси Бонки миллии Тоҷикистон (БМТ) Ҷамолиддин Нуралиев изҳор доштааст, ки «агар ХБА тариқи воситаҳои қарзҳои васеи худ ба ҷумҳурӣ 500 млн. доллари ИМА маблағ ҷудо мекард, мувофиқи мақсад ва оқилона мебуд».
Нуралиев қайд кардааст, ки масъалаи аз ҷониби ҳукумат ба Хазина муроҷиат кардан алҳол то охир ҳаллу фасл нашудааст ва айни замон бо Хазина дар робита ба ин масъала гуфтушунид ҷараён дорад. «Бо дигар ниҳодҳои молии байнулмилалӣ низ Тоҷикистон дар ин маврид гуфтушунид дорад», – иброз доштааст ӯ.
Муовини раиси БМТ таъкид доштааст, ки моҳи декабри соли гузашта Бонки осиёгии рушд барои дастгирии буҷет 60 млн. доллари ИМА маблағ ҷудо карда, бо Бонки ҷаҳонӣ дар мавриди ҷудо кардани 30 лн. доллари ИМА ва бо Фонди авруосиёӣ доир ба ихтисос додани 20 млн. доллари ИМА гуфтушунидҳо ҷараён доранд.
Нашрия навиштааст, барои дастрас кардани кумак аз ХБА ҳукумати Тоҷикистон бояд як қатор шартҳо, аз ҷумла қатъи назорати асъор ва ҳамчунин роҳандозии ислоҳоти бонкӣ ва муассисаҳои давлатиро бипазирад.
Зимнан зикр мегардад, ки агар ҳатто ҳукумати Тоҷикистон ба ин шартҳо розӣ шавад ҳам, ҳаҷми қарзи ХБА аз 500 млн. доллари ИМА ба таври назаррас камтар хоҳад буд.
