Бо қарори навбатии Раёсати Бонки миллии Тоҷикистон (БМТ) ба Ҷамъияти саҳомии пӯшидаи “Бонки байналмилалии Тоҷикистон” Иҷозатнома барои анҷом додани амалиёти бонкӣ бо пули миллӣ ва асъори хориҷӣ дода шуд.
Бино ба иттилои хадамоти матбуоти БМТ, ки ҶСП “Бонки байналмилалии Тоҷикистон” тариқи табдилдиҳӣ дар заминаи Ҷамъияти дорои масъулияти маҳдуди Ташкилоти амонатии қарзии хурди «Стандарт молия» таъсис дода шуда, муассисони он шаҳрвандони кишвар ба шумор мераванд.
Гуфта мешавад, ба бонк табдил додани ҶДММ ТАҚХ «Стандарт молия» доираи анҷом додани амалиётҳои бонкиро васеъ намуда, дастрасии аҳолӣ ба хизматрасониҳои бонкӣ, пешниҳоди хизматрасониҳои босифат ва муосири молиявӣ ва беҳтар кардани вазъияти молиявӣ ва рушди иқтисодиёти ҷумҳуриро таъмин менамояд.
Зимнан зикр мегардад, ки номи ҶСП “Бонки байналмилалии Тоҷикистон” дар Феҳристи ташкилотҳои қарзӣ ва Маълумотномаи “Рамзҳои мушаххаси бонкии ташкилотҳои қарзии Ҷумҳурии Тоҷикистон” дохил карда мешавад.
