Муовини сарвазири Ҷумҳурии Тоҷикистон Азим Иброҳим бо сафири Франсия Дидие Леруа ва ҳайати ширкати «Аэробус» (Airbus) дидору гуфтушунид кард.
Бино ба иттилои АМИТ «Ховар», зимни мулоқот масоили ба роҳ мондани ҳамкориҳои мутақобилан судманди дуҷониба ҷиҳати харидорӣ намудани тайёраҳои истеҳсоли ширкати «Аэробус» бо шарту шароитҳои муносиб барои ширкатҳои ватанӣ, бақайдгирии минбаъдаи онҳо, дар доираи имкониятҳои ширкат аз ҳисоби мутахассисони ҷавони маҳаллӣ омода намудани сарнишинон, ҳайати техникӣ, омӯзиши ҳавонавардон дар донишгоҳҳои авиатсионии Франсия, расонидани кумакҳои машваратӣ ба авиатсияи граждании Тоҷикистон ва таъмини бехатарии парвозҳо баррасӣ шуданд.
Гуфта мешавад, зимни вохӯрӣ сафири Франсия аз муовини сарвазири Тоҷикистон даъват ба амал овард, ки ҷиҳати оғоз намудани баррасии лоиҳаи Созишномаи байниҳукуматии Франсия ва Тоҷикистон оид ба канорагирӣ аз ситонидани андозбандии дукарата бо мақсади роҳ ёфтани ширкатҳои ин ду кишвар ба бозори молу хизматрасонии ҳамдигар мусоидат намояд.
Зимнан зикр мегардад, ки ҳамчунин ҷониби Франсия пешниҳод намуд, ки бо мақсади содда гардонидани рафтуомади шаҳрвандони ҳарду кишвар ва иштироки бештари доираҳои соҳибкорон барои рушди ҳамкориҳои мутақобилан судманд зарурати кушодани хатсайри мустақим аз Душанбе ба Париж тавассути Франкфурт ба миён омадааст. Азим Иброҳим изҳор намуд, ки ҳукумати Тоҷикистон барои ҳамкорӣ омода аст.
