Вазири молияи Тоҷикистон Абдусалом Қурбониён рӯзи 17 май дар шаҳри Душанбе бо намояндагони Бонки авруосиёии рушд (БАОР) таҳти роҳбарии муовини раиси Раёсати ин бонк Максим Коржов дидору гуфтушунид кард.
Бино ба иттилои котиботи Вазорати молияи ҶТ, зимни мулоқоти созанда оид ба масоили муҳим ва дурнамои ҳамкориҳои дуҷониба дар бахшҳои моливу бонкӣ ва дигар соҳаҳои фаъолият табодули назар сурат гирифт.
Ҷонибҳо рафти амалисозии барномаҳои муштарак ва ҳамчунин масъалаҳои расонидани кумаки молӣ ва техникӣ ба Тоҷикистон аз ҷониби созмонҳои байнулмилалии молиро мавриди баррасӣ қарор доданд.
Қайд шуд, ки тамоми тадбирҳои андешидаи ҳукумати Тоҷикистон ба коҳиши сатҳи камбизоатӣ ва беҳбуди некӯаҳволии мардуми кишвар нигаронида шудааст.
Дар ҷараёни вохӯрӣ ба масъалаҳои рушди соҳибкорӣ ва тиҷорат, бахши хусусӣ, ҷорӣ намудани технологияҳои нав ва табодули таҷриба миёни кишварҳои минтақа дар сатҳҳои гуногун ва тарзҳои қобили қабул, ки ба рушди иқтисодии Тоҷикистон мусоидат карда метавонанд, таваҷчуҳи хосса зоҳир гардид.
