Дар шаҳри Маскав рӯзи 9 июн вохӯрии котибони Шӯрои амнияти Русия ва Тоҷикистон Николай Патрушев ва Абдураҳим Қаҳҳоров доир гардида, дар ҷараёни мулоқот вазъ дар минтақаи Осиёи Марказӣ, таҳдиду хатарҳои аз қаламрави Афғонистон бармеомада ва ҳамчунин масоили ҳамкориҳои дуҷонибаи низомӣ ва низомӣ-техникӣ баррасӣ шуданд.
Бино ба иттилои сомонаи расмии Шӯрои амнияти Русия, зимни мулоқот мушкилоти марбут ба иштироки шаҳрвандони кишварҳои хориҷӣ дар низоъҳои мусалалҳона дар сафҳои созмонҳои байнулмилалии террористӣ низ баррасӣ шуда, ба масъалаи ҳамкории дуҷониба дар бахши муҳоҷирати корӣ таваҷҷуҳ зоҳир гардидааст.
Гуфта мешавад, ҳамин рӯз ҳамчунин бо иштироки намояндагони Вазорати мудофиаи ФР, ВКД ФР, Хадамоти федералии амнияти Русия ва намояндагони КДАМ ҶТ, ВКД ҶТ ва Вазорати меҳнат, муҳоҷират ва шуғли аҳолии Тоҷикистон машваратҳои коршиносони Шӯроҳои амнияти ҳарду кишвар оид ба масоили таъмини амнияти минтақавӣ ва байнулмилалӣ баргузор шудаанд.
