Кормандони Хадамоти гумруки назди ҳукумати ҷумҳурӣ аз кӯшиши воридоти ғайриқонунии як миқдор дастгоҳҳои барқтаъминкунанда (трансформаторҳо) аз Қирғизистон ба қаламрави кишвар ҷилавгирӣ намуданд.
Бино ба иттилои дафтари матбуоти Хадамоти гумрук, зодаи ноҳияи Спитамен Р.Р.-и 38-сола бо роҳи ғайриқонунӣ ва бидуни анҷоми расмиёти гумрукӣ аз кишвари ҳамсоя ба ҷумҳурӣ 8 адад трансоформаторҳоро ворид кардааст.
Ба иттилои манбаъ, иқтидори трансформаторҳо ба 100 кВА то 400 кВА баробар буда, арзиши умумии онҳо беш аз 208 ҳазор сомониро ташкил медиҳад.
Зимнан зикр мегардад, ки аз рӯи ин далел мутобиқи моддаи 289, қ. 1-и Кодекси ҷиноии ҶТ (Қочоқ) парвандаи ҷиноӣ боз шуда, он ҷиҳати баррасӣ ба прокуратураи вилояти Суғд ирсол шудааст. Барои содир намудани ин ҷиноят ҷарима дар ҳаҷми аз 10 то 36 ҳазор сомонӣ ё маҳрумият аз озодӣ ба муҳлати то 5 сол пешбинӣ шудааст.
