Вазорати нақлиёти Тоҷикистон маълумоти Палатаи ҳисоб оид ба аз ҷониби ин мақомот ошкор шудани зиёни молиявӣ дар ҳаҷми 4 млн. 13 ҳазор сомониро зимни санҷиши корҳои сохтмон дар нақби «Истиқлол» дар давраи аз 1 августи соли 2014 то 1 июни соли 2016 рад мекунад.
Сардори идораи Мудирияти корхонаҳои сохташудаистодаи Вазорати нақлиёти ҶТ Абдулмаҷид Шарифов ба «Азия-Плюс» иттилоъ дод, ки ин маълумот нодуруст буда, дар санади аз ҷониби Палатаи ҳисоб тартибдодашуда аз рӯи натиҷаҳои санҷиш, ки бо тамоми имзоҳо дар шуъбаи муҳосиботи корхона нигаҳдорӣ мешавад, дар бораи зиёни молиявӣ ва он ҳам бо ин миқдори зиёд чизе гуфта нашудааст.
А.Шарифов қайд кард, ки соли 2003 лоиҳаи нақб бо иштибоҳҳо таҳия гардида, солҳои 2006-2012 аз рӯи ин лоиҳа корҳо ба иҷро расонида шудаанд.
«Барои обпартои нақб соли 2006 қубурҳои асбесту сементӣ гузошта шуда, то соли 2012 об тариқи нақби нақлиётӣ ҷорӣ мешуд ва ба ҳаракати нақлиёт мушкилӣ эҷод мекард. Соли 2014 қубурҳо бо канали обпартои масофааш 1627 метр иваз шуда, ҷоришавии об дар нақби нақлиётӣ аз байн бурда шуд ва шояд Палатаи ҳисоб ҳамон воситаҳои сарфшуда аввал барои насби қубурҳо ва сипас ивази онҳо соли 2014 ба канали обпарторо дар назар дошта бошад», – гуфт ӯ.
Ёдрас мекунем, ки зимни нишасти хабарии рӯзи 5 август раиси Палатаи ҳисоби Тоҷикистон Дилмурод Давлатзода
изҳор намуд
, ки дар ҷараёни санҷиши корҳои бозсозии нақби «Истиқлол» аудиторони палата дар ҳаҷми 4 млн. 13 ҳазор сомонӣ зиёни молиявӣ ошкор намудаанд.
