Вазорати корҳои хориҷии Тоҷикистон шарҳи сардори Раёсати иттилоот, матбуот, таҳлил ва тарҳрезии сиёсати хориҷии Вазорат дар робита ба озмоиши бомби атомӣ дар Кореяи Шимолиро интишор кард.
Дар ин шарҳ таъкид мешавад: «Мо дар мавриди нигарониҳои ҷомеаи ҷаҳонӣ дар робита ба озмоиши силоҳи ҳастаӣ 9 сентябри соли 2016 дар Кореяи Шимолӣ ҳамақида ҳастем. Ингуна иқдомҳои Пхенян таҳдидҳои ҷиддӣ ба амнияти ҷаҳонӣ ва минтақавӣ эҷод менамояд».
Гуфта мешавад, дар ин замина, Тоҷикистон аз талошҳо барои ҳаллу фасли қазияи ҳастаӣ дар нимҷазираи Корея аз тариқи абзорҳои сиёсию дипломатӣ ва инчунин изҳороти Шӯрои амнияти СММ ва Агентии байналмилалии энергияи атомӣ (IAEA), ки Кореяи Шимолиро барои иҷрои ҳатмии қатъномаҳои дахлдори ША СММ даъват намудаанд, ҷонибдорӣ мекунад.
