Се нафар намояндагони Комиссияи марказии интихобот ва раъйпурсӣ (КМИР)-и Тоҷикистон ҷиҳати пайгирӣ (мониторинг)-и интихоботи президентӣ дар Ӯзбекистон, ки санаи 4 декабр доир мегардад, ба сифати нозирон ба шаҳри Тошканд мераванд.
Бино ба иттилои расида аз дастгоҳи КМИР Тоҷикистон, ҳайати Тоҷикистон дар ин сафар аз раиси КМИР Бахтиёр Худоёрзода ва аъзои КМИР – олим, котиби Академияи илмҳои ҷумҳурӣ Ҷамшед Ҷамшедов ва ректори Донишгоҳи давлатии омӯзгории Тоҷикистон Носирҷон Салимӣ иборат аст.
Қобили зикр аст, ки қаблан Тоҷикистон ҳеҷ гоҳ чунин ҳайати бонуфузеро барои пайгирии интихоботи президентиву парлумонӣ дар дигар кишварҳо сафарбар накарда буд.
Рӯзи 23 сентябр Комиссияи марказии интихоботи Ӯзбекистон дар бораи роҳ додани ҳамаи 4 ҳизби сабтиномшуда ба маъракаи интихоботи президентӣ қарор қабул кард.
Дар анҷуманҳои Ҳизби миллӣ-демократӣ «Миллий тикланиш» (Эҳёи миллӣ) – номзадии муовини раиси палатаи қонунгузор (поёнӣ)-и парлумон Сарвар Отамуродов, Ҳизби халқӣ-демократии Ӯзбекистон – номзадии раиси ҳизб Ҳотамҷон Кетмонов ва Ҳизби сотсиал-демократии «Адолат» – номзадии пешвои он Наримон Умаров дар интихобот ба мансаби президенти Ӯзбекистон тасдиқ шуд.
Номзадии нахуствазири Ӯзбекистон Шавкат Мирзиёев, ки муваққатан иҷрокунандаи вазифаи президенти кишвари ҳамсоя аст, дар анҷумани Ҳизби либералӣ-демократии Ӯзбекистон тасдиқ карда шуд.
Ҳамаи номзадҳои ба мансаби президентӣ пешабришуда то имрӯз расман дар Комиссияи марказии интихоботи Ӯзбекистон ба қайд гирифта шудаанд.
