Комиссияи махсусе, ки ба муайян кардани сабабҳои садама дар низоми энергетикии ҷумҳурӣ рӯзи 28 октябр машғул аст, корашро дар муҳлати ваъдашудаи ду ҳафта ба охир нарасонид ва энергетикҳо мегӯянд, инро сабаб он аст, ки онҳо ба вохӯриҳо бо ҳамтоҳои худ аз Эрон саргарм будаанд.
«Комиссияе, ки рӯзи дигари пас аз садама дар низоми энергетикии ҷумҳурӣ таъсис ёфта буд, ба кори худ идома медиҳад», – хабар дод ба «Азия-Плюс» як манбаъ аз бахши энергетикаи ҳукумати Тоҷикистон.
Ба иттилои манбаъ, сабаби кашолёбии кори комиссия дар он аст, ки роҳбарони бахши энергетикаи ҷумҳурӣ дар ҷаласаи навбатии комиссияи байниҳукуматии Тоҷикистону Эрон, ки нимаи ҳамин ҳафта дар Теҳрон доир гардид, иштирок доштаанд.
Дар ҳамин ҳол, манбаъ итминон дод, ки натиҷаҳои таҳқиқи комиссияи махсус оид ба муайян кардани сабабҳои садама дар нерӯгоҳи Норак, ки аксари қаламрави кишварро бо нерӯи барқ таъмин мекунад, муддати се-чор рӯзи наздик пешкаши ҳамагон мегардад.
Ёдрас мекунем, ки рӯзи 28 октябр қариб тамоми ҷумҳурӣ бе нерӯи барқ монда буд. Қаблан аз ширкати «Барқи тоҷик» иттилоъ дода буданд, ки ин ҳолати ғайримунтазира дар Тоҷикистон бинобар сабаби бозистии агрегатҳои нерӯгоҳи Норак ба иллати носозиҳо дар низоми энергетикии кишвар ва таври автоматӣ ба кор даромадани низоми зиддисадамавӣ ба вуҷуд омад.
«Бо ин сабаб соати 18:29 дақиқаи рӯзи 28 октябр қариб ба тамоми қаламрави ҷумҳурӣ интиқоли барқ қатъ шуд. Танҳо Вилояти Мухтори Кӯҳистони Бадахшон бо барқ таъмин буд», – гуфта буд ба «Азия-Плюс» сухангӯи ширкати «Барқи тоҷик» Нозирҷон Ёдгорӣ.
Ба гуфтаи ӯ, дар натиҷаи бонавбат дубора ба кор даровардани агрегатҳои нерӯгоҳ ва таъмини кори хатҳои баландшиддати интиқоли барқ, марҳила ба марҳила интиқоли барқ барқарор карда шуд.
«Шоми ҳамон рӯз раиси ширкат Мирзо Исмоилзода тариқи шабакаҳои телевизиони давлатӣ ин вазъро шарҳ дода, барои рӯйи кор омадани чунин ҳолати ногувор аз аҳолӣ маъзарат хост», – иттилоъ дод Ёдгорӣ.
Қобили зикр аст, ки пештар ҳам дар нерӯгоҳи Норак садамаҳо рух дода буданд. Моҳи ноябри соли 2009 бар асари чунин як садама дар нерӯгоҳи Норак ҳудуди 70 фоизи қаламрави Тоҷикистон бе барқ монда буд.
Тибқи арзёбии мутахассисон, менависад «Фергана», ҳолатҳои ғайримунтазира дар нерӯгоҳҳои барқие, ки ҳанӯз замони шӯравӣ сари салтанат будани Брежнев ба истифода дода шудаанд, дар натиҷаи сарф шудани захираҳои боэътимодии кори он рух медиҳанд.
Нерӯгоҳи барқи обии Норак дар 90-километрии ҷанубу шарқи шаҳри Душанбе ҷойгир шуда, соли 1972 мавриди баҳрабардорӣ қарор гирифт ва агрегати охиринаш соли 1979 ба истифода дода шуд.
Ҳамчунин мавриди зикр аст, ки дар манотиқи деҳоти Тоҷикистон аз 1 ноябр реҷаи маҳдуди истифодаи нерӯи барқ (лимит) ҷорӣ шуд. Дар ширкати «Барқи тоҷик» изҳор мекунанд, ки лимит ба хотири сарфаи оби обанбори Норак мавриди амал қарор гирифтааст.
