Директори генералии ширкати давлатии ҳавопаймоии «Тоҷик Эйр» Хайрулло Раҳимов дар мавриди парвози ҳавопаймоҳо тариқи хатсайри Душанбе – Хоруғ изҳор намуд, ки агар фармоиш бошад, ширкат имкон дорад, ки парвоз ба ин самтро таъмин кунад.
«Ширкати мо парвозҳои доимӣ тариқи хатсайри Душанбе – Хоруғро аз 5 октябри соли гузашта мутаваққиф кард, – шарҳ дод ӯ. – Лекин мо варианти эҳтиётӣ дорем, ки он чархболи Ми-8 буда, ин чархбол ҷиҳати парвоз ба ҳама гуна самтҳо муддати 24 соат дар як шабонарӯз омода аст».
Дар идома ӯ гуфт, дар шароити мувофиқати обуҳаво, бо чархболи Ми-8 метавон 22 нафар мусофиронро ба нуқтаи таъинот расонид, ки «шуморашон аз ҳавопаймои АН-28, ки қаблан дар ин самт парвоз мекард, зиёдтар мебошад».
«Ҳавопаймои АН-28, ки бо хатсайри мазкур парвоз мекард, ба таъмир ниёз дорад, вале аксари қисмҳои эҳтиётиаш аллакай истеҳсол намешаванд, – иброз дошт номбурда. – Аз ин рӯ, ба хотири таъмини амнияту бехатарии мусофирон мо парвозҳо тариқи ин хатсайрро боздоштем».
Ёдрас мекунем, ки қаблан аз «Тоҷик Эйр» иттилоъ дода буданд, ки Хоруғ яке аз самтҳои аз нигоҳи стратегӣ муҳим ба шумор рафта, раҳбарияти ширкати назди худ мақсад гузоштааст, ки парвози ҳавопаймоҳо тариқи хатсайри Душанбе-Хоруғ-Душанберо барқарор намояд.
