Мақомоти интизомӣ дар Бритониё мегӯянд, ки бар асари таркиши шаби 23-юми май дар як толори консертӣ дар шаҳри Манчестер дар шимоли ин кишвар, 22 нафар кушта ва 59 тани дигар захмӣ шудаанд.
Бино ба иттилои Радиои Озодӣ, раиси пулиси Манчестер дар нишасти хабарӣ гуфтааст, ки "мо дар ҳоли таҳқиқ дар бораи ин таркиш ба унвони як иқдоми террористӣ ҳастем". Вай дар идома гуфтааст, ки дар ин ҳодиса 22 нафар кушта ва 59 тани дигар захмӣ шудаанд ва маҷрӯҳон ба шаш бемористон дар Манчестер интиқол дода шудаанд.
Ин ҳодиса дар маҳали баргузории консерти Ариан Гранде, овозхони ҷавони амрикоӣ рӯй додааст. Як сухангӯи Ариан Гранде гуфтааст, ки дар ин таркиш ба ин овозхони зан, осебе нарасидааст. Тибқи гузоришҳо, дар толори консертӣ, ки зарфияти 21 ҳазор нафар дорад, ҳазорон ҷавон, ки бештари онҳо духтар буданд, ҳузур доштанд. Бар пояи хабарҳо, таркиш дар лаҳзаҳои ахири консерт ва дар берун аз толор, рух додааст.
Тибқи гузоришҳо, дар ин консерт 20 ҳазор нафар иштирок доштанд.
Як мақоми амниятии амрикоӣ низ гуфтааст, ки яке аз ҳамлаварон дар берун аз ҷои баргузории консерт худро таркондааст. Дар ҳамин ҳол шоҳидони айнӣ мегӯянд, пас аз садои таркиш, мардум ба тарафи дарвозаҳои хуруҷии толор шитофтанд. Тибқи гузоришҳо, дар ин консерт 20 ҳазор нафар иштирок доштанд.
Як шоҳиди айнии дигар гуфтааст, ки дар ҳудуди соати 10:35 ба вақти маҳаллӣ, фақат як садои баланд шунида шуд ва баъд мардум саросема ба тарафи дарҳои хуруҷӣ шитофтанд. Тибқи гузоришҳо, садҳо тан аз нерӯҳои амниятӣ ва зиддитеррористии Бритониё дар кӯчаву хиёбонҳои Манчестер ҷобаҷо шудаанд.
Дар ҳамин ҳол, Тереза Мей, нахуствазири Бритониё эълом кардааст, ки таҳқиқот дар бораи ин ин ҳодиса ба унвони як таркиши террористӣ хоҳад буд. Хабаргузории Рейтерз мегӯяд, дар сурате, ки ба таври расмӣ таъйид шавад, ки таркиши Манчестер як ҳамлаи террористӣ будаааст, ин инфиҷор бузургтарин ҳамлаи террористӣ аз соли 2005 то кунун хоҳад буд. Дар ҳамлаҳои террористии соли 2005 дар Лондон, 52 нафар кушта шуданд.
