Кормандони Агентии назорати давлатии моиявӣ ва мубориза бо коррупсияи Тоҷикистон ба гумони ғайриқонунӣ азхудкунии маблағҳо корманди филиали «Амонатбонк» дар ноҳияи Балҷувонро боздошт намуданд. Ин зан бо ҳуҷҷатҳои қалбакии нафақахӯрон беш аз 71 ҳазор сомонӣ маблағҳоро азхуд кардааст.
Бино ба маълумоти дафтари матбуоти Агентии зиддифасод, Муродалиева Хосият Аҳмадовна аз моҳи майи соли 2013 дар вазифаи нозир хазинадор оид ба мубодилаи асъори филиали №75 БДА ҶТ «Амонатбонк» дар ноҳияи Балҷувон кор карда, дар давраи фаъолияти кориаш ба номи нафақахӯрон дар ҳудуди ноҳияи Балҷувон расидҳои қалбакӣ тайёр намудааст.
Гуфта мешавад, дар давоми аз моҳи августи соли гузашта то замони боздошт ӯ тариқи тартиб додани ҳуҷҷатҳои қалбакӣ ба номи нафақахӯрон беш аз 71 ҳазор сомонӣ маблағҳои бонкро ғайриқонунӣ азхуд намуда, ба эҳтиёҷоти шахсиаш сарф кардааст.
Зимнан зикр мегардад, ки вобаста ба ҳолати зикргардида нисбати Муродалиева Хосият Аҳмадовна бо аломатҳои моддаи 245 қисми 3 банди «а» ва 323-и КҶ Ҷумҳурии Тоҷикистон парвандаи ҷиноятӣ оғоз карда шуда, тафтишоти пешакӣ идома дорад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
