Вазорати корҳои дохилии Тоҷикистон шаҳрвандони ҷумҳуриро огоҳ мекунад, ки дар шабакаи интернет боз як вируси тахрибкор бо номи «Petya» паҳн гардидааст.
Дар маълумоти дар ин робита интишоргардидаи Вазорат қайд мешавад, ки тарзи паҳнкунии он дар шабакаи интернетӣ ба монанди вируси «WannaCry» мебошад.
Гуфта мешавад, усули ҳифзи аз ҳама оддитарин аз вируси «Petya» ва дигар вирусҳои ҳаммонанд – ҷавоб надодан ва накушодани мактубҳои шубҳанок аз ҷониби шахсони ношинос буда, дар ҳолати пайдо шудани чунин мактуб фавран онро тоза (удалить) кардан зарур аст.
Дастур дода мешавад, ки «Бодиққат бошед, windows ва таъмини барномаҳои зиддивирусиро (антивирусное ПО) навсозӣ намоед!».
Дар ҳамин ҳол, Муҳаммадӣ Ибодуллоев, раҳбари Бунёди ҷамъиятии ташаббуси шаҳрвандӣ ва сиёсати Интернет дар Тоҷикистон ба Радиои Озодӣ гуфтааст, онҳо ҳам ҳоло ягон иттилое дар бораи зарари ин вирус ба компютерҳо дар Тоҷикистон надоранд, аммо ҳанӯз аз шоми 27 июн тамоми ширкатҳоро аз хатари таҳдиди ин вирус огоҳ карда будаанд.
