Ояндаи наздик ҶСК “Ориёнбонк” дар якҷоягӣ бо сармоягузорони хориҷӣ сохтмони корхонаи истеҳсоли семент дар ноҳияи Қубодиёни вилояти Хатлонро оғоз мекунад. Дар ин бора аз ҳукумати ин ноҳия хабар доданд.
Бино ба маълумоти Файзуллозода Зафар, раиси ноҳияи Қубодиён, айни замон мутахассисони хитойӣ корҳои лоиҳакаширо дар ин мавзеъ ба анҷом расонида, дар назар аст, ки сохтмони ин завод то ҷашни 26-умин солгарди Истиқлолияти давлатии Ҷумҳурии Тоҷикистон бо иштироки Президенти кишвар Эмомалӣ Раҳмон оғоз гардад.
Гуфта мешавад, аз ҷониби Тоҷикистон масоили ташкилии ин лоиҳа ба уҳдаи Ширкати инвеститсионию истеҳсолии “Ориёнинвест” вогузор шудааст.
Ширкати мазкур соли 2015 бо Қарори Раиси Раёсати “Ориёнбонк” Ҳасан Асадуллозода бо ҳадафи ҷалби сармояи хориҷӣ ва бунёди корхонаҳои истеҳсолӣ, аз ҷумла корхонаи истеҳсоли семент ва ташкили ҷойҳои нави корӣ таъсис шудааст.
Ба гуфтаи Саидисматулло Валиев, Директори генералии ШИИ “Ориёнинвест”, корхонаи нави истеҳсоли семент бо саҳмгузории ҶСК “Ориёнбонк”, Ширкати холдингии “Исмоили Сомонӣ” ва ширкати хитойии “Хенан Чжун-Я Гуруҳи холдингӣ” бунёд ёфта, иқтидори тавлидотии он 5 ҳазор тоннаро дар ду хатти истеҳсолӣ дар як шабонарӯз (2500 тонна навъи М-400 ва 2500 тонна навъи ба сулфаттобовар) ташкил медиҳад.
“Ин корхона бо маблағи беш аз 160 миллион доллари ИМА ва 1000 ҷойи корӣ сохта шуда, тибқи лоиҳа, дар заминаи он корхонаҳои дигари истеҳсолӣ, аз ҷумла, корхонаи истеҳсоли шакар бо парвариш ва коркарди лаблабуи қанд ва корхонаи истеҳсоли кафел ҳам бунёд меёбад. Бунёди ин корхонаҳо, қабл аз ҳама, бо ҳадафи рушди иқтисоди миллии Тоҷикистон, ба вуҷуд овардани ҷойҳои нави корӣ ва баландбардории иқтидори содиротии кишвар дар назар гирифта шудааст”, – мегӯяд Валиев.
Зимнан, ширкати хитойии “Хенан Чжун-Я Гуруҳи холдингӣ” айни замон ба таҷдид ва азнавсозии яке аз бузургтарин корхонаҳои саноатии Тоҷикистон – ҶСК “Азот” дар шаҳри Сарбанд машғул аст, ки чанд моҳ қабл бо иштироки Президенти кишвар Эмомалӣ Раҳмон оғоз ёфт.
Масъулини Ширкати “Ориёнинвест” мегӯянд, ширкат дар ҷалби сармоягузорон барои таҷдид ва азнавсозии ҶСК “Азот” дар шаҳри Сарбанд ҳам фаъол буд.
Дар Ширкати “Ориёнинвест” тафовут ва афзалияти корхонаи нави истеҳсоли сементро дар он арзёбӣ мекунанд, ки 50 дарсади маҳсулоти худро сементи навъи ба сулфаттобовар истеҳсол мекунад. Ин навъи семент асосан барои иншоотҳои бузург ва стратегӣ, аз қабили неругоҳҳо, пешбинӣ шуда, дар бозори маҳсулоти сохтмонӣ харидорони зиёд дорад. Муассисони корхона истифодаи сементи истеҳсоли ин корхонаро дар нерӯгоҳҳои дохилӣ ва иншоотҳои берун аз кишвар сохташаванда мувофиқ арзёбӣ мекунанд.
Гуфта мешавад, бо иқтидори солонаи 2 миллион тонна ин завод бузургтарин корхонаи истеҳсоли семент дар Тоҷикистон хоҳад буд.
Саҳми ҷонибҳои сармоягузор дар ин лоиҳа зикр карда намешавад.
