Дар доираи барномаҳои фарҳангӣ бахшида ба таҷлили ҷашни 20-солагии Рӯзи Ваҳдати миллии Тоҷикистон, Соли ҷавонон ва Истиқлолияти давлатии Ҷумҳурии Тоҷикистон Фестивали ҳунарии ҷумҳуриявии нобиноён таҳти унвони “Дунёи меҳр” баргузор мегардад.
Фестивал аз ҷониби Вазорати фарҳанги Тоҷикистон ва Иттиҳодияи миллии нобиноёни Тоҷикистон бо мақсади дарёфти чеҳраҳои нав ва ҷавон, истеъдодҳои нодир дар байни шахсони нобино ва қувваи босираашон суст, арҷ гузоштан ба мероси бойи аҷдодон, тарғибу ташвиқи санъати ниёгон ва муосири тоҷик, беҳтар ба роҳ мондани фаъолияти дастаҳои худфаъолияти бадеӣ дар назди филиалҳои Иттиҳодияи миллии нобиноёни Тоҷикистон, баланд бардоштани завқи зебоипарастӣ, хештаншиносии наврасону ҷавонон ва мустаҳкам намудани робитаи эҷодӣ байни ҳаваскорони санъат ва устодони варзидаи ҷумҳурӣ баргузор мегардад. Дар ҷашвора ҳамаи хоҳишмандони то 35-солаи қувваи босираашон суст ё нобино, ки дар навозиши асбобҳои миллӣ ва аврупоӣ, иҷрои сурудҳои фолклорӣ ва классикӣ, инчунин хониши бадеии шеъру тарона ва порчаҳои насрӣ истеъдод доранд, иштирок карда метавонанд.
Баргузории даври аввали фестивал моҳҳои июл ва августи соли 2017 дар мавзеъҳои зерин дар назар аст:
– Рӯзи 13 июли соли 2017 дар толори Қасри фарҳанги шаҳри Қӯрғонтеппа барои шаҳру ноҳияҳои вилояти Хатлон.
– Рӯзи 18 июли соли 2017 дар толори Қасри фарҳанги шаҳри Панҷакент барои иштирокчиён аз шаҳру ноҳияҳои Айнӣ, Кӯҳистони Мастчоҳ.
– Рӯзи 20 июли соли 2017 бо иштироки ҳаваскорони санъат аз шаҳру ноҳияҳои Истаравшан, Бӯстон, Гулистон, Истиқлол, Мастчоҳ, Ашт, Деваштич, Спитамен, Зафаробод, Б.Ғафуров ва Ҷ.Расулов дар толори Кохи фарҳанги ба номи А.Рӯдакии шаҳри Хуҷанд.
– Рӯзи 21 июли соли 2017 бо иштироки хаваскорони санъат аз шаҳрҳои Конибодом ва Исфара дар толори Қасри фарҳанги шаҳри Исфара.
– Рӯзи 2 августи соли 2017 дар Муассисаи давлатии “Театри мусиқӣ-драмавии ба номи М. Назаров”-и шаҳри Хоруғ бо иштироки намояндагони шаҳру ноҳияҳои ВМКБ.
– Рӯзи 5 августи соли 2017 бо иштироки ҳаваскорони санъат аз шаҳри Душанбе, Ҳисор, Шаҳринав, Турсунзода, Рӯдакӣ, Варзоб дар толори Қасри фарҳанги шаҳри Ҳисор.
– Рӯзи 8 августи соли 2017 дар толори Қасри фарҳанги шаҳри Вахдат бо иштироки ҳаваскорони санъат аз шаҳру ноҳияҳои Вахдат, Лахш, Тоҷикобод, Рашт, Нуробод, Роғун, Файзобод ва Норак.
Даври ҷамъбастии фестивал 22 сентябри соли 2017 бо иштироки 35 нафар ғолибон аз тамоми шаҳру навоҳӣ дар толори Филармонияи давлатии Ҷумҳурии Тоҷикистон ба номи А. Ҷӯраев баргузор мегардад. Ғолибон бо тӯҳфаҳои хотиравӣ қадр карда мешаванд.
