Ронандаи автомашинаи боркаши тамғаи ЗИЛ, ки ҳудуди 25 нафар аз маросими ҷанозаву дафн дар он нишаста буданду бо суръати баланд ба дарахт бармхӯрд, ба 7,5 соли зиндон маҳкум шуд.
Ёдрас мекунем, ки ин ҳодисаи фоҷеабор рӯзи 11 март дар наздикии қабристон баъди маросими дафни як сокини шаҳри Ваҳдат рух дод. Ҳудуди 25 нафар иштирокчиёни маросими ҷанозаву дафн барои бозгашт аз қабристон ба шаҳр ба автомашинаи тамғаи «ЗИЛ» савор шуда, дар нишебӣ тормозҳои он кор намекунанд ва мошин бо суръати баланд ба дарахт бармехӯрад.
Дар натиҷа 7 нафар мусофирони автомашинаи мазкур, сокинони шаҳрҳои Душанбе ва Ваҳдат дар ҷойи ҳодиса ба ҳалокат расида, 13 нафари дигар бо ҷароҳатҳои гуногуни ҷисмонӣ дар беморхона бистарӣ шуданд.
Бино ба маълумоти Прокуратураи генералии ҶТ, Б.Маҷидов ба риоя накардани талаботи Қоидаҳои ҳаракат дар роҳ, аз ҷумла дар қисми болои автомашина ҷойи борбардории он ғайриқонунӣ зиёда аз 25 нафар мусофиронро савор кардан гунаҳкор дониста шудааст.
Гуфта мешавад, бо ҳукми суди шаҳри Ваҳдат Маҷидов Б.З. дар содир намудани ҷиноят бо моддаи 212 қисми 3 КҶ Ҷумҳурии Тоҷикистон гунаҳгор дониста шуда, ба муҳлати 7 солу 6 моҳ аз озодӣ маҳрум карда шуд.
