Коршиноси тоҷики масоили Афғонистони муосир Қосим Бекмуҳаммад бар ин назар аст, ки бо даъвати Афғонистонро тарк кардани ИМА, Маскав мавқеи Кобули расмиро, ки ҳеҷ гоҳ мухолифи ҳузури артиши ИМА ва НАТО нест, ба инобат нагирифтааст.
Ба гуфти коршинос, эътилофи низомии кишварҳои НАТО таҳти сарварии ИМА қариб пурра вазифаҳои дар наздашон гузошташуда ҳанӯз дар соли 2001 – аз байн бурдани Ал-Қоида ва пешвои он Усома бин Лоданро иҷро карданд.
Номбурда изҳор намуд, ки ИМА ҳеҷ гоҳ назди худ вазифа нагузоштаанд, ки бо «Толибон» мубориза баранд ва «ин вазифаи онҳо набуд».
«Ҳеҷ кас дар ҷаҳон даъвати Маскав аз Вашингтон ҷиҳати тарки Афғонистонро ҷиддӣ қабул надорад, зеро ба аксарият аён аст, ки чунин даъватҳо аз муқовимати Русия ва ИМА дар Сурия бармеоянд», – таъкид дошт коршинос.
Дар ҳамин ҳол, ӯ хотиррасон намуд, ки имрӯз миёни Маскаву Кобул дар робита ба маълумоти робитаи эҳтимолии Кремл бо толибон як навъ шиддати муносибатҳо ба вуҷуд омадааст.
Айни замон ҳудуди 8400 нафар хизматчиёни ҳарбии ИМА ва қариб 5000 низомиёни НАТО дар Афғонистон ҳузур доранд. Нерӯҳои амрикоӣ ҳамроҳ бо артиши Афғонистон ба баргузории амалиёти зиддитеррористӣ ва кумак ба низомиёни маҳаллӣ машғуланд. Тибқи маълумоти USA Today, имрӯз дар ИМА имкони ба дӯши паймонкорони хусусӣ вогузор шудани қисмате аз ваколатҳои низомиро баррасӣ доранд.
Агентии Reuters хабар дод, ки ҳаракати Толибон бо талаби аз Афғонистон хориҷ кардани артиши ИМА ба президенти ин кишвар бо мактуби кушод муроҷиат намуд.
«Таҷрибаи пешин гувоҳи он аст, ки сафарбарии шумори зиёди нерӯҳои низомӣ ба Афғонистон ба ҷуз тахриби иқтидори ҳарбӣ ва иқтисодии ИМА, чизи дигаре ба бор намеоварад», – зикр шудааст дар номаи толибон бо забони англисӣ.
Толибон изҳор доштаанд, ки низоъ дар Афғонистон бо роҳи аз кишвар хориҷ кардани нерӯҳои низомии хориҷӣ ҳаллу фасл мешавад.
