Мақомоти Ӯзбекистон аз Москва хостанд, ки дороиҳои духтари калонии президенти пешини ин кишвар Ислом Каримовро дар Русия ба ҳабс гирад.
Бино ба иттилои сомонаи Бахши хабарии Осиёи Марказӣ, Гулнора Каримова дар Русия дар маҷмааи "Камолот"-и Москва пентҳауз, дар минтақаи Рублевка ҳавлӣ ва 8 хона дорад. Дар Ялтаи Қрим меҳмонхона, манзили истиқоматӣ ва қитъаи замин низ дорад.
Дафтари матбуоти Додситонии кулли Русия рӯзи 24 август гуфт, ки дархости ҷониби Ӯзбекистон мавриди баррасӣ қарор дорад, аммо ҷузъиёти аз ин бештар надод.
Гулнора Каримова мудати тӯлоние ба сарояндагӣ машғул буд ва ба худ номи мустаори Googoosha-ро низ гирифта буд. Вай ҳамчунин як муддат дар бахши дипломатия фаъолият кардааст.
Бори аввал дар бораи доду гирифтҳои машкуки Гулнора соли 2012 хабар расид. Рӯзноманигорони телевизиони Шветсия хабар доданд, ки Гулнора Каримова барои иҷозати фаъолияти ширкати мобилии шведӣ дар Ӯзбекистон пора талаб кардааст.
Моҳи октбяри соли 2013 Гулнора дар Ӯзбекистон дар тамаъҷӯӣ ва саркашӣ аз пардохти андоз айбдор шуд. Вай чанд солро дар ҳабси хонагӣ пушти сар кард. Моҳи августи соли 2015 додгоҳи Тошканд ӯро панҷ сол аз озодӣ маҳрум сохт.
