Даҳҳо нафар зойирин аз Истаравшану Панҷакент баъди бозгашт аз кӯҳи Арафот зери ҳавои кушод монданд. Чизҳои онҳоро аз хаймаҳо берун партофта буданд.
Навори видео доир ба чӣ гуна чизҳояшонро ҷустуҷӯ кардани зойирини тоҷикро Абдуллоҳи Низом мунташир кардааст.
Котиби матбуотии Кумитаи дин Афшин Муқим ба «Азия-Плюс» дар ин робита иттилоъ дод, ки дар мавриди ҷойгиркунии зойирин бесарусомонӣ рух додааст. «Ширкати масъул ба ҷойгиркунии зойирини Арабистони Саудӣ дар муайян кардани хаймаҳои зойирини тоҷику ӯзбек ба иштибоҳ роҳ дода, хоҷиёни моро дар хаймае ҷой додаанд, ки дар он бояд шаҳрвандони Ӯзбекистон ҷой мегирифтанд. Масъалаи ҷойгиркунии шаҳрвандони мо базудӣ ҳал шуд», – гуфт намояндаи Кумита.
Дар ҳамин ҳол, бори аввал нест, ки зойирини тоҷик дар мавриди ҷойгиршавиашон шикоят мекунанд. Онҳо мегӯянд, маъмулан меҳмонхонаҳое, ки дар онҳо шаҳрвандони мо иқомат мекунанд, дар ҷойи дур ва нобоб ҷойгир шудаанд. Бархе аз хизматрасонии роҳбаладон низ норозигӣ изҳор мекунанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
