Кумитаи ҳолатҳои фавқулодда ва мудофиаи граждании назди Ҳукумати ҶТ ба таваҷҷуҳи шаҳрвандон ва меҳмонони кишвар мерасонад, ки тибқи иттилои обуҳовосанҷон 4-уми октябри соли равон дар қаламрави ҷумҳурӣ ҳавои номусоид боқӣ мемонад.
Бино ба иттилои дафтари матбуоти Кумита, шамол шиддат гирифта, дар як сония 17-22 метр мевазад ва ҳавои боронӣ дар назар буда, дар баландиҳои бештар аз 2500 метр борон ба барф табдил меёбад.
Гуфта мешавад, аз ин рӯ Кумитаи ҳолатҳои фавқулодда аз аҳолии кишвар бо эҳтиром хоҳиш мекунад хеле эҳтиёткор ва ҳушёру зирак бошанд. Бахусус, дар роҳандозии корҳои саҳро ботаваҷҷуҳ бошанд.
Дар ин рӯз аз ҷамъоварии ҳезум дар манотиқи куҳӣ ва рафтан ба шикоргоҳ ба қасди шикор худдорӣ кунанд.
Ронандаҳо талош намоянд ҳангоми ҳаракат дар роҳҳои куҳӣ масофаи таъиншударо риоя намоянд, боло бурдани суръати ҳаракати мошин муҷиби садамаҳо шуда метавонад.
Ёдрас мешавад, ки бар асари боришоти шадид имкон дорад дар роҳҳо санг резад ва ин хатари ҳаракат дар роҳҳои мошингардро дучанд мекунад.
