Шаҳрванди Тоҷикистон, ки барои даст доштан дар гардиши ғайриқонунии маводи мухаддир дар Русия адои ҷазо карда буд, ҳангоми бозгашт дар фурудгоҳи шаҳри Душанбе боздошт шуда, суд ӯро барои боз ҳамин гуна қонуншиканӣ ба 16 соли зиндони низомаш шадид маҳкум кард.
Тавре ба «Азия-Плюс» Эраҷ Ализода, судяи суди шаҳри Хуҷанд ва ҳамзамон раиси мурофиаи мазкур хабар дод, сокини ҷамоати Оббурдони ноҳияи Мастчоҳ Абдувоҳид Шарипови 34-сола соли 2010 дар Русия барои даст доштан дар муомилоти ғайриқонунии маводи нашъаовар, ки он замон аз ӯ 5 кило маводи мухаддир дарёфт шуда буд, ба 6 соли зиндон маҳкум шуда, то ин замон дар Тоҷикистон барои ҳамин амал мавриди ҷустуҷӯ эълон шуда буд.
Бино ба гуфтаи манбаъ, он вақт мақомоти ҳифзи ҳуқуқ ҳангоми кофтукови хонаи А.Шарипов 54 кило маводи мухаддирро дарёфт ва мусодира карда буданд.
«Аммо он вақт ба ӯ муяссар шуд, ки паноҳ барад, – гуфт судя. – Акнун баъди адои ҷазо дар Русия, ҳангоми бозгашт ба ватан аввали соли 2017 ӯ аз ҷониби мақмоти ҳифзи ҳуқуқ дар фурудгоҳи Душанбе боздошт шуд».
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
