Кормандони Раёсати Агентии назорати давлатии молиявӣ ва мубориза бо коррупсия дар вилояти Суғд зимни баргузории чорабиниҳои фаврӣ-ҷустуҷӯӣ ба фаъолияти як гурӯҳи ҷиноятпешаи машғул ба муомилоти ғайриқонунии маводи мухаддир хотима бахшиданд.
Бино ба иттилои дафтари матбуоти Агентии зиддифасод, ба ин гурӯҳ ваколатдори калони оперативии ШКҶ ШВКД-и ҶТ дар вилояти Суғд Руслан Шарипов ва сокини ноҳияи Мастчоҳ Муҳаммад Шарифов шомил будаанд.
«Санаи 22 ноябри соли 2017 дар натиҷаи гузаронидани чорабиниҳои оперативи-ҷустуҷуӣ Муҳаммад Шарифов ва Руслан Шарипов зимни муомилоти ғайриқонунии воситаи нашъадор дастгир гардиданд», – омадааст дар маълумоти Агентӣ.
Гуфта мешавад, аз онҳо ба миқдори 34 кг. 759 грамм воситаи нашъадори афюн ва 47кг. 157 грамм воситаи нашъадори ҳашиш, ки ҷамъи умумии онҳо 81 кг. 916 граммро ташкил медиҳад, дарёфт ва мусодира карда шуд.
Зимнан зикр мегардад, ки вобаста ба ҳолати зикргардида нисбати гумонбаршудагон Шарифов бо моддаи 200 қисми 4 банди “д” КҶ ҶТ парвандаи ҷиноятӣ оғоз карда шуда, тафтишоти пешакии он идома дорад. Дар ин модда маҳрумият аз озодӣ ба муҳлати аз 12 то 20 сол пешбинӣ мегардад.
