Раиси шаҳри Душанбе Рустами Эмомалӣ дар бораи санаи 15 март даъват кардани иҷлосияи 14-уми Маҷлиси вакилони халқи шаҳри Душанбе, даъвати панҷум қарор ба имзо расонид.
Бино ба иттилои дафтари матбуоти мақомоти шаҳрдории пойтахт, ба рӯзномаи иҷлосия масъалаи дар бораи пеш аз муҳлат қатъ намудани ваколатҳои се вакили Маҷлиси вакилони халқи шаҳри Душанбе ворид шудааст, ки инҳо Шахноз Раҳматова, Субҳон Сафиаллоев и Шоҳ Давлатов мебошанд.
Шахноз Раҳматова бинобар сабаби таъин шуданаш ба вазифаи муовини раиси Кумитаи меъморӣ ва сохтмони назди ҳукумати Тоҷикистон, Шоҳ Давлатов бо сабаби ба иқомати доимӣ ба хориҷи кишвар рафтан ва Субҳон Сафиаллоев бо сабаби содир намудани амалҳои ғайриқонунӣ ваколатҳои худро қатъ мекунанд.
Тавре ба «Азия-Плюс» қаблан роҳбари ташкилоти Ҳизби коммунист дар пойтахт хабар дода буд, Субҳон Сафиаллоев дар қаллобӣ гумонбар дониста мешавад. Ӯ дар Агентии зиддифасод бозпурсӣ шудааст, хабар дод ба «Азия-Плюс» як манбаъ аз мақомоти ҳифзи ҳуқуқи кишвар.
Ғайр аз ин, дар иҷлосияи рӯзи 15 март масъалаи марбут ба табдили номи навбатии кӯчаҳои шаҳр низ баррасӣ мешавад. Иваз шудани номи маҳз кадом кӯчаҳо танҳо баъди иҷлосия маълум мешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
