Дар роҳ аз фурудгоҳи пойтахт то қароргоҳи муваққатӣ, ки дар ҷараёни сафар қароргоҳи ҳукумати Тоҷикистон мешавад, президенти Ӯзбекистонро ҳазорон сокинони пойтахт бо парчамҳои давлатии ҳарду кишвар ва шиору лавҳаҳо пешвоз мегиранд. Дар ин бора ба «Азия-Плюс» як манбаъ аз ҳукумати Тоҷикистон хабар дод.
Зимни сафари давлатии рӯзҳои 9-10 марти Шавкат Мирзиёев ба Душанбе дидору гуфтушунидҳои ӯ бо президенти Тоҷикистон Эмомалӣ Раҳмон, раиси палатаи поёнии парлумони ҷумҳурӣ Шукурҷон Зуҳуров ва нахуствазири кишвар Қоҳир Расулзода дар назар аст.
Маросими расмии пешвози меҳмони олимақом наздикии нимаи рӯз дар Кохи миллат доир гардида, сипас вохӯрии танҳо ба танҳои сарони кишварҳои Тоҷикистону Ӯзбекистон баргузор мешавад.
Пас аз ин вохӯрии васеи ҳайатҳои расмии кишварҳо доир гардида, дар фарҷоми он маросими имзои созишномаҳои байнидавлатӣ ва байниҳукуматии дуҷониба баргузор мешавад, ки дар он аз имзои беш аз 20 созишномаи нав интизорӣ меравад.
Баъдан сарони кишварҳои Тоҷикистону Ӯзбекистон барои васоити ахбори умум изҳороти муштараки худро пешниҳод мекунанд.
Қарибиҳои бегоҳ Шавкат Мирзиёев ба пояи муҷассамаи асосгузори нахустин давлати тоҷикон Исмоили Сомонӣ гулчанбар мегузорад.
Сипас сарони кишварҳо дар марҳилаи хотимавии форуми иқтисодии Тоҷикистону Ӯзбекистон дар коҳи «Истиқлол» ва маросими ифтитоҳи намоишгоҳи молу маҳсулоти Ӯзбекистон дар маҷмааи варзишии «Манеж» иштирок мекунанд.
Шоми ҳамин рӯз сарони кишварҳо ва ҳайати расмии давлатҳо, намояндагони доираҳои дипломатии муқими Душанбе ва аҳли ҷомеаи Тоҷикистон дар консерти устодони санъати ҳарду кишвар таҳти унвони «Шоми дӯстӣ» дар Кохи Борбад ширкат меварзанд.
Нимаи аввали рӯзи 10 март Шавкат Мирзиёев дар қароргоҳи муваққатии худ бо раиси палатаи поёнии парлумони Тоҷикистон Шукурҷон Зуҳуров ва нахуствазири кишвар Қоҳир Расулзода дидору гуфтушунид мекунад.
Нимаи дуюми санаи10 март президенти Ӯзбекистон ба Тошканд раҳсипор мегардад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
