Дар маҷмааи таърихию фарҳангии «Истиқлол»-и шаҳри Хуҷанд чорабинии марказии Рӯзи ҷавонони Тоҷикистон дар вилояти Суғд доир гардид.
Бино ба иттилои хадамоти матбуоти раиси вилоят, тантанаҳои идона ба муносибати Рӯзи ҷавонон бо раҳпайпоии беш аз 20 ҳазор нафар наврасону ҷавонони саодатманд таҳти унвони “Ҷавонон – пайрави Пешвои миллат” оғоз ёфт.
Раҷаббой Аҳмадзода, раиси вилояти Суғд зимни суханронии худ ҷавонони сарбаланди вилоятро бахшида ба Рӯзи ҷавонон табрик гуфта, ба онҳо саломативу саодати рӯзгор, тансиҳативу хонаободӣ, иқболи баланд ва дар амалӣ намудани мақсаду ниятҳои нек муваффақиятҳои беназир таманно кард.
Гуфта шуд, ки имрӯзҳо дар вилоят беш аз 813 ҳазор нафар ҷавонони синни аз 14 то 30-сола умр ба сар мебаранд, ки аз ин миқдор зиёда аз 405 ҳазор нафари онҳо духтарон мебошанд. Ҷавонон дар тамоми соҳаҳо – хизмати давлатӣ, маорифу тандурустӣ, тиҷорату иқтисод, кишоварзиву саноат кору фаъолият намуда, барои пешрафти Тоҷикистони соҳибистиқлол саҳми арзандаи худро мегузоранд.
Аз ҷумла, 656 нафар ҷавонон ҳамчун хизматчии давлатӣ дар вазифаҳои гуногун фаъолият намуда истодаанд, ки 30,9%-и хизматчиёни давлатиро ташкил дода, аз онҳо 109 нафар дар мансабҳои роҳбарикунанда фаъолияти пурсамар мебаранд. 102 нафар ҷавонони пешқадам вакилони мақомоти маҳаллии намояндагӣ, аз ҷумла 93 нафар вакилони ҷамоатҳои шаҳраку деҳот, 9 нафар вакилони Маҷлиси вакилони халқи шаҳру ноҳияҳо мебошанд.
Раҷаббой Аҳмадзода бо ишора ба зуҳуроти номатлуби ҷаҳони муосир аз қабили терроризм ва экстремизм таъкид кард, ки ҷавонони бонангу номуси вилоят бояд дар мубориза бар зидди шомилшавии баъзе ашхоси роҳгумзада ба ҳизбу ҳаракатҳои тундрав, пешгирии густариши фаъолияти ҳизбу ҳаракатҳои иртиҷоӣ фаъолона ширкат варзанд ва ҷиҳати баланд бардоштани маърифати ҳуқуқии хеш кӯшиш ба харҷ диҳанд.
Гуфта мешавад, дар идомаи чорабинӣ аз ҷониби аҳли санъати вилоят барномаи ҷолиби фарҳангӣ пешниҳод гардид, ва ҷавонон дар фазои орому осуда ва зери осмони софи Ватани маҳбуб то дергоҳ рақсу бозӣ намуданд. Мушакпаронии идона ба чорабинӣ шукӯҳи тоза бахшид.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
