Сафорати Тоҷикистон дар Туркманистон маълумот дар робита ба гӯё даргузашти як зани туркманро назди сафоратхона дар навбати гирифтани раводид (виза) рад кард.
Дар изҳорот қайд мешавад, ки маълумоти нашршуда дар чанде аз васоити ахбори умум дар бораи гӯё рӯзи 21 август назди сафоратхона фавтидани як зани туркман дар навбати гирифтани раводид асоси воқеӣ надошта, зан зиндаву солим аст.
“Тамоми ҷузъиёти ҳодисаи дар ВАО нашршударо дақиқан омӯхта, маълумот медиҳем, ки 17 август, на балки 21 август, тавре аз маълумоти ВАО бармеояд, шаҳрванди зикршуда писари худ Отамуродро ҳамроҳӣ мекард, ки ба шуъбаи консулгарии сафорат барои гирифтани раводиди таҳсил дар Тоҷикистон муроҷиат намуда буд. Назди бинои сафорат аҳволи зан ногаҳон бад шуда, мошини ёрии таъҷилии тиббӣ даъват шуд, ки ба зан кумаки тиббии зарурӣ расонида шуда, вазъи солимиаш комилан муътадил гардид. Писари ӯ Отамурод тасдиқ намуд, ки маълумоти нашршуда дар бораи даргузашти модараш бардурӯғ буда, таъкид дошт, ки айни замон ӯ солиму тандуруст дар вилояти Лубоб қарор дорад”, – қайд мешавад дар изҳороти сафорат.
Сафорати Тоҷикистон дар Туркманистон таъкид мекунад, ки сарфи назар аз шумори зиёди одамони муроҷиаткунанда барои гирифтани раводид ба Тоҷикистон ва мушкилоти техникии айни замон мавҷуда, ки ба расмиёти электронии таҳияи раводид марбут аст, шуъбаи консулгарӣ ҷиҳати додани он мутобиқи регламенти муқарраршуда ҳамаҷониба кӯшиш ба харҷ медиҳад.
Сафорат аз намояндагони ВАО даъват ба амал овардааст, ки аз нашри маълумоти носаҳеҳу носанҷида ва беэътимод худдорӣ кунанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
