Ҳукумати Тоҷикистон ба парлумон пешниҳод намуд, ки Хазинаи суғуртаи пасандози шахсони воқеӣ аз пардохти боҷҳои давлатӣ дар судҳо озод карда шавад.
Лоиҳаи дахлдори тағйироту иловаҳо ба қонун «Дар бораи боҷи давлатӣ» аз ҷониби ҳукумат таҳия ва ҷиҳати баррасӣ ба парлумон ирсол шудааст, хабар дод ба “Азия-Плюс” як манбаъ аз Маҷлиси намояндагони Маҷлиси Олии Тоҷикистон.
Мувофиқи тағйироту иловаҳои пешниҳодшуда, Хазинаи суғуртаи пасандози шахсони воқеӣ аз пардохти боҷҳои давлатӣ дар судҳо озод карда мешавад.
Хазинаи суғуртаи пасандози шахсони воқеӣ соли 2011 бар асоси қонуни ҶТ “Дар бораи суғуртаи пасандози шахсони воқеӣ” бо мақсади ҳимоя аз манфиатҳои қонунии амонатгузорон ва таҳкими эътимоди мардум ба низоми бонкӣ таъсис дода шудааст.
Хазина шахси ҳуқуқии ғайритиҷоратӣ буда, дорои тавозуни мустақилу мӯҳр аст ва дар асоси шартномаи байни бонкҳо ва Оинномаи вай, ки муассисони Хазина тасдиқ кардаанд, фаъолият мекунад.
Маблағи Хазина аз пардохтҳо, даромад аз сармоягузорӣ, маблағи аз Ҳукумати Тоҷикистон қарз гирифташуда, маблағи барои қонеъгардонии шикояти пасандоздорон гирифташуда, ки манфиатҳои онҳо мутобиқи Қонуни мазкур ба Хазина вогузор шудаанд, инчунин аз дигар маблағҳое иборат мебошад, ки қонун манъ накардааст.
Хазина метавонад танҳо ба коғазҳои қиматноки Ҳукумати Ҷумҳурии Тоҷикистон, коғазҳои қиматноки Бонки миллии Тоҷикистон, коғазҳои қиматноки давлатҳои хориҷӣ ё бонкҳои марказии (миллии) хориҷии бонуфуз сармоягузорӣ кунад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
