Дар Рӯзи ҷаҳонии матбуоти озод, 3 май, дар Душанбе дар конфронси байналмилалии “Ёрии расонаҳо барои рушди пойдори сулҳ ва демократия” 130 рӯзноманигор ва коршиносони расонаии Тоҷикистон, Узбекистон, Қирғизистон, Қазоқистон, Русия ва Афғонистон гирди ҳам меоянд.
Ҳамоиш бо ибтикори Шӯрои ВАО-и Тоҷикистон ва Дафтари барномаҳои САҲА дар Душанбе баргузор мешавад. Ба сифати меҳмон дар конфрос намояндаҳои воломақоми Ҳукумат ва Парлумони Тоҷикистон ва созмонҳои байналмилалӣ даъват шудаанд. Дар доираи конфрос бахшҳои гуногуне перомуни баррасии мушкилоти расонаҳо дар даврони рақамишавӣ ва ҳамчунин тақвияти асосҳои иқтисодӣ, ҳуқуқӣ ва ахлоқии фаъолияти расонаҳо ҳамчун омили таъминкунандаи озодӣ ва истиқлоли онҳо сурат мегирад. Ҳамчунин интизор меравад, ки намояндаҳои кишварҳои минтақа дар баррасиҳои марбут ба фанновариҳо ва равандҳои нав, таъсири онҳо ба озодии баён ва рушди арзишҳои демкоратӣ ширкат варзанд.
Ба асоси натиҷаҳои кофронс тавсияҳо коркард ва барои баррасӣ ба ниҳодҳои давлатӣ ва доираҳои густардаи ҷомеаи журналистӣ пешниҳод мешаванд.
Дар доираи конфронси “Ёрии расонаҳо барои рушди пойдори сулҳ ва демкоратия” барандаи ҷоизаи “Эътимод”-и Шӯрои ВАО-и ҶТ эълон карда мешаванд. Ҳамчунин ҷоизаи вижа ба довталаби “Мавриди таваҷҷуҳи аудитория” низ дода мешавад.
Ҳамчунин ҷоизаи ифтихории “Эътимод” ба тоҷикони кишварҳои Қазоқистон, Узбакистон ва Афғонистон барои муаррифии шоиста аз Тоҷикистон ва фарҳангу тамаддуни тоҷик тақдим карда мешавад.
Тамоми раванди конфронс ба таври зинда аз тариқи шабакаҳои иҷтимоӣ, аз ҷумла Фейсбук ва Ютуб нашр карда мешавад.
Забони кори конфронс – тоҷикӣ, русӣ ва инглисӣ мебошад.
Конфронс бо пуштибонии молии САҲА, Институти «Ҷамъияти Кушода» Бунёди Мадад – Тоҷикистон, Сафоратхонаҳои ИМА, Бритониёи Кабир, Намояндагии Иттиҳоди Аврупо дар Тоҷикистон, Оҷонсии ҳамкориҳои байналмилалии Ҷопон (JIСA) дар Тоҷикистон, намояндагии созмони байналмилаии Internews Network баргузор мешавад.
Ҳадафи асосии баргузор кардани ҳамоиши мазкур рушди гуногунандешӣ ва озодии баён дар дунё мебошад. Ҳамасола Рӯзи ҷаҳонии матбуоти озод таҳти шиорҳои гуногун бо ҳузури густардаи доираҳои рӯзноманигорӣ дар қолаби конфронсу семинор ва дарсҳои боз таҷлил карда мешавад.
Маълумот
Бори аввал ҳамоиш бахшида ба озодии баён 3 майи соли 1991 дар пойтахти Намибиё – шаҳри Виндҳук баргузор шуд. Декабри соли 1993 Қатъномаи СММ 3 Майро расман Рӯзи ҷаҳонии матбуоти озод эълон кард. Асоси ин қарори 26-уми ҷаласаи Генералии конфронси ЮНЕСКО аз соли 1991 бо номи “Пуштибонӣ ва таъмини озодии матбуот дар дунё” гардид. Дар Тоҷикистон он аз соли 2001 ба ин сӯ таҷлил карда мешавад.
