Раиси шаҳри Душанбе Рустами Эмомалӣ дар бораи ташкили истироҳати тобистонаи кӯдакон ва наврасони шаҳри Душанбе дар соли 2019 қарор ба имзо расонид.
Бино ба иттилои дафтари матбуоти мақомоти шаҳрдории Душанбе, ба сохторҳои марбутаи шаҳр ҷиҳати ташкили истироҳати кӯдакону наврасон дар мавсими тобистон дар истироҳатгоҳҳо (лагерҳо)-и солимгардонӣ дастур дода шудааст.
Дар қарор супориш дода мешавад, ки дар истироҳатгоҳҳои беруназшаҳрии «Зимчуруд», «Гулхан», «Шарора» ва «Орзу», инчунин майдончаҳои истироҳатию солимгардонии назди муассисаҳои таълимӣ, ки дар онҳо ташкилу баргузории истироҳати тобистонаи кӯдакону наврасон пешбинӣ шудааст, то 30 майи соли 2019 корҳои ободонӣ, сохтмонӣ, таъмиру барқароркунӣ, муҷаҳҳазгардонии биноҳо ва майдончаҳои варзишӣ, ҳавзҳои шиноварӣ, кабудизоркунию ниҳолшинонӣ ба анҷом расонида шуда, иншооти мазкур барои қабули кӯдакону наврасон омода шавад.
Назорати иҷрои қарори мазкур ба зиммаи муовини раиси шаҳри Душанбе Мавсума Муинӣ ва раисони ноҳияҳои шаҳри Душанбе: Шоҳмансур – Иброҳими Билол, Фирдавсӣ – Муҳаммадраҳим Юсуфӣ, Сино – Нусратулло Салимзода ва Исомили Сомонӣ – Шариф Самӣ вогузор шудааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
