Кумитаи дин ва танзими ҷашну маросимҳои Тоҷикистон бо дархости дубора барқарор намудани фаъолияти 594 масҷиди қаблан басташуда ба Дастгоҳи иҷроияи президент рӯйхати ин масҷидҳоро фиристодааст, хабар дод ба “Азия-Плюс” як манбаъ дар Кумитаи мазкур.
Бино ба гуфтаи манбаъ, қаблан аз Дастгоҳи иҷроияи Сарвари давлат аз онҳо дархост шудааст, ки чунин рӯйхатро пешниҳод намоянд.
“Мо аз дастгоҳи президент дар мавриди таҳияи рӯйхати масҷидҳое, ки дубора барқарор кардани фаъолияташон имкон дорад, мактуб гирифтем. Ин тасмим аз ҷониби президент дар робита ба муроҷиатҳои сершумори шаҳрвандон дар ин хусус гирифта шудааст. Ин ҷо сари масҷидҳои басташуда дар ҷамоатҳо сухан меравад”, – гуфт манбаъ.
Зимнан зикр шуд, ки комиссияи махсус ин масъаларо дар минтақаҳо мавриди омӯзиш қарор дода, бар асоси қарори онҳо рӯйхат тартиб дода шудааст.
“Дар рӯйхат асосан масҷидҳое зикр шудаанд, ки дар ҷамоату деҳаҳои дурдаст қарор дошта, дигар ҷойи намозгузорӣ надоштанд. Дар ин маҳалҳо одамонро лозим меомад, ки барои намозхонӣ ба деҳаҳои ҳамсоя раванд. Ин хеле душворӣ пеш меовард, бахусус барои пиронсолон”, – қайд кард манбаъ.
Манбаъ ҳамчунин хабар дод, ки рӯйхати зикршуда бо дастгоҳи президент, ҳамчунин раҳбарияти шаҳру ноҳияҳо мувофиқа мешавад. Масҷидҳоро дар оғози моҳи шарифи Рамазон дубора боз карданӣ будаанд, лекин санаи дақиқи он алҳол маълум нест.
Соли 2017 фаъолияти беш аз 1 ҳазору 700 масҷид дар Тоҷикистон қатъ шуд. Соли 2018 танҳо дар вилояти Суғд зиёда аз 123 масҷиду мадраса ба муассисаҳои таъиноти иҷтиомиву фарҳангӣ – бунгоҳҳои тиббӣ, коргоҳҳои дӯзандагӣ, толорҳои варзишӣ ва китобхонаҳо табдил дода шуданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
