Чорабиниҳои сатҳи ҷумҳуриявӣ бахшида ба ҷашни 22-юмин солгарди Рӯзи ваҳдати миллӣ имсол дар ноҳияи Рашт баргузор мешаванд, хабар доданд ба “Азия-Плюс” аз ҳукумати Тоҷикистон.
Чорабиниҳо бо иштироки Сарвари давлат Эмомалӣ Раҳмон, кормандони ҳукумат, аъзои парлумон, ходимони илму фарҳанги кишвар, намояндагони корпусҳои дипломатӣ ва созмонҳои байнулмилалии муқими Тоҷикистон доир мегарданд.
Санаи 27 июни соли 1997 дар Маскав байни ҳукумати Тоҷикистон ва Иттиҳоди нерӯҳои мухолифини тоҷик Созишномаи истиқрори сулҳ ва ризоияти миллӣ ба имзо расид, ки ба ҷанги шаҳрвандии солҳои 1992-1997 дар Тоҷикитсон хотима бахшид.
Ба муносибати ҷашни Рӯзи ваҳдати миллӣ санаи 27 июн дар ҳамаи боғҳои фарҳангу истироҳати шаҳри Душанбе сайругаштҳои оммавии сокинону меҳмонони Душанбе доир гардида, ярмаркаҳои маҳсулоти хӯрокворӣ ташкил мешаванд. Шоми ҳамин рӯз дар тамоми боғҳои фарҳангу истироҳати шаҳр бо иштироки устодони саъати ҷумҳурӣ консертҳо баргузор мешаванд.
Мувофиқи фармони президенти Тоҷикистон ва қонуни қабулшуда аз 22 майи соли 1998 ҷашни Рӯзи ваҳдати миллӣ яке аз идҳои расман муқаррашуда дар Тоҷикистон мебошад. Мувофиқи меъёрҳои қонунгузории Тоҷикистон, ин сана – 27 июн дар ҷумҳурӣ рӯзи истироҳат эълон шудааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
