Дар посух ба барқияи вазири корҳои дохилии Тоҷикистон Рамазон Раҳимзода дар мавриди нашри навори видеои лату кӯби бераҳмонаи як шаҳрванди Тоҷикистон вазири корҳои дохилии Русия Владимир Колоколтсев изҳор намудааст, ки ба санҷиши тамоми ҳолатҳои ҳодиса аз рӯйи далелҳо дастур додааст.
“Вазири корҳои дохилии Русия генерали политсия Владимир Колоколтсев ба воҳидҳои дахлдори Вазорат дастур дод, ки аз рӯи далели дар шабакаи интернет нашр шудани сабти навори видеои амалҳои зӯроварона нисбати як мард, эҳтимол шаҳрванди Тоҷикистон санҷиш гузаронида шавад”, – хабар дода мешавад дар сомонаи ВКД Русия.
Қайд мешавад, ки айни замон корҳои санҷиши ҳақиқӣ будани сабти навори видео, муайян кардани шахсияти иштирокчиёни навор, сана, макон ва дигар ҳолатҳои содир шудани ҷиноят ҷараён доранд.
“Дар бораи натиҷаи санҷишҳо ва қароири қабулшуда мақомоти ҳифзи ҳуқуқи Тоҷикистон бо тартиби муақарраршуда огоҳ карда мешаванд”, – хабар додааст намояндаи расмии ВКД Русия Ирина Волк.
Посух ба барқияи вазири корҳои дохилии Тоҷикистон аз он оғоз меёбад, ки сарфи назар аз мансубияти миллии ҷабрдида ва гумонбаршудагон, мақомоти ҳифзи ҳуқуқи Русия назди худ мақсад гузоштаанд, ки ин ҷиноятро ошкор ва гунаҳкоронро боздошт намоянд.
Дар ҳамин ҳол, ВКД Русия ҳодисаи куштори устоди варзиш оид ба гуштини юнонӣ-румӣ Сергей Чуевро, ки дар ин куштор шаш нафар шаҳрвандони Тоҷикистон гумонбар дониста мешаванд, низ хотиррасон намудааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
