Шӯрои ВАО имрӯз зимни як нишасти матбуотӣ натиҷаи риояи Меъёрҳои ахлоқии фаъолияти журналистӣ дар Тоҷикистонро муаррифӣ кард.
Мониторинги мазкур матолиби нашрияҳо ва сомонаҳои интернетии узви Шӯрои ВАО-ро дар се моҳи соли равон (аз аввали июн то охири август) мавриди баррасӣ қарор додааст. Тӯли ин муддат аз сӯйи 24 расона (сомонаҳои бархе расонаҳо ҳамчун ВАО-и алоҳида ба эътибор гирифта шудаанд) 13 банди Меъёрҳои ахлоқӣ 159 бор нақз шудаанд.
Ба гуфтаи дастандаркорони мониторинг, баъзан расонаҳои кишвар Меъёрҳои ахлоқии фаъолияти журналистиро ба таври огоҳона ва дағалона вайрон мекунанд.
Аз 17 банди Меъёрҳо беш аз ҳама банди 12 (Ҷудо будани эҷодиёт аз тиҷорату реклама – 35 бор), банди 5 (Иффати миллӣ ва эҳтироми фарҳанги ғайр – 26 бор), банди 14 (Асардуздӣ/плагиат – 21 бор), банди 7 (Ҳифзу шаъну шараф ва эътибори шахс – 20 маротиба) ва банди 8 (эҳтимоли бегуноҳӣ – 20 бор) вайрон шудаанд.
Аз ҷумла, “СССР” – 19, “Фараж” – 18, “Самак” – 18, “Оила” – 16, “Хатлон” – 2, “Пайк” – 5, Tajikistantimes.com – 15, Hakikati-sugd.tj – 1, Paik.tj – 3, Oila.tj – 5, Vecherka.tj – 1, Gazeta.tj – 7, Faraj.tj – 4, cccr.tj – 5, “Чархи гардун” – 8, “Народная газета” – 1, “Ҷавонони Тоҷикистон” – 5, “Муҳаббат ва оила” – 4, News.tj – 7, “Дайджест пресс” – 2, “Тоҷикистон” – 4, “Азия-Плюс” – 3, “Вечёрка” – 3, “ИмрӯзNews” – 3 маротиба Меъёрҳои ахлоқиро нақз кардаанд.
Дар ин нишаст гуфта шуд, ки баррасии мазкур теъдоди ками расонаҳоро фаро гирифта, ширкатҳои радио ва телевизион шомили он нашудаанд. Агар ВАО-и бештар мавриди омӯзиш қарор мегирифт, эҳтимол вазъ аз ин ҳузнангезтар мебуд. Аз ҷумла, фазои ногувори иҷтимоӣ ва иқтисодӣ барои рушди расонаҳо, инчунин ба вуҷуд омадани шабакаҳои иҷтимоӣ бархе аз ВАО-и суннатиро водор кардааст, ки барои дарёфти манбаъи молии фаъолият хеле аз меъёрҳои ахлоқиро зери по кунанд. Баъзе ҳамкасбон дар навиштаву расонаҳои худ аз забони хушунат, паст задани шаъну шараф, тарғиби зӯроварӣ ва пешдоварӣ кор мегиранд. Ин ҳама тамоюлҳо ба нафъи рӯзноманигорӣ набуда, баръакс эътимоди расонаҳо ва муаллифони онҳоро дар назди мухотаб ва ҷомеа коста мегардонад.
Зикр гардид, ки ниҳодҳои худтанзимкунандаи фаъолияти ВАО бештар ба хотири ҳимояи худи рӯзноманигорон ва расонаҳо буда, рушди журналистикаи босифату боахлоқ ба нуфуз ва обрӯйи идораҳои воситаҳои ахбор ва кормандони онҳо мусоидат мекунад.
Намояндагони Шӯрои ВАО нақзи “Меъёрҳои ахлоқии фаъолияти журналистӣ дар Тоҷикистон”-ро маҳкум намуда, аз расонаҳо ва ҳамкасбон хоҳиш карданд, ки бо риояи одоби касбӣ дар рушди рӯзноманигории босифат ва расонидани иттилои дурусту беғараз саҳм бигиранд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
