Мақомоти ҳифзи ҳуқуқ дар ВМКБ ба шикорчиёни маҳаллӣ барои парронидани гургҳо ба хотири таъмини бехатарии одамон ва талаф наёфтани чорвои хонагӣ аз ҳамлаи ин даррандагон силоҳ тақсим карданд.
Тавре хадамоти матбуоти ҳукумати ВМКБ иттилоъ медиҳад, ҳамлаи гургон ба одамон ва чорвои хонагӣ дар фасли зимистон яке аз мушкилоти аҳолии ВМКБ мебошад.
Гуфта мешавад, зимистони соли гузашта 2 нафар одамон, ҳамчунин чорво ва сагон қурбони ҳамлаҳои гургон шуданд.
Таъкид мешавад, ки барои таъмини бехатарии аҳолӣ, ситоди доимо амалкунандаи вилоятии мақомоти ҳокимият таъсис дода шуд.
Дар маълумот қайд мешавад, ки милитсия ва мақомоти амният ба аксари аъзои ассотсиатсияи шикорчиён барои парронидани гургон милтиқу тир додаанд. Ҳамчунин ба шикорчиён барои нобудсозии даррандагон қапқонҳо дода шудааст.
Тавре зикр мешавад, шикорчиёне, ки аз ҳама бештар ба нобуд кардани гургҳо даст меёбанд, аз лиҳози моддӣ ҳавасманд гардонида мешаванд.
Дар деҳаҳое, ки шикорчиёни маҳаллӣ нестанд, аз ҳисоби кормандони мақомоти ҳифзи ҳуқуқ ва мақомоти амният навбатдории шабонарӯзӣ ба роҳ монда шудааст.
Ёдрас мекунем, ки пас аз низоъи мусаллаҳонаи тобистони соли 2012 байни сохторҳои қудратӣ ва сокинони шаҳри Хоруғ, силоҳи аҳолӣ бо шумули милтиқҳои шикорчиён мусодира шуда буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
