Бонки миллии Тоҷикистон овозаҳо дар бораи дар бемористон бистарӣ шудани муовини аввали раиси БМТ Ҷамолиддин Нуралиевро рад кард.
“Ҷамолиддин Нуралиев айни замон дар утоқи корияш қарор дошта, вазъи солимияш хуб аст, – хабар доданд ба “Азия-Плюс” аз хадамоти матбуоти Бонки миллӣ. – Овозаҳо дар бораи аз коронавирус сироят ёфтани ӯ асоси воқеӣ надоранд”.
Аз хадамоти матбуоти Бонки миллӣ ҳамчунин суратеро пешниҳод карданд, ки дар он Нуралиев ҳангоми машқ дар толори варзишӣ аксбардорӣ шудааст.
Дар ҳамин ҳол, овозаҳо дар беморхона бистарӣ будани сардори Раёсати кофтукови ҷиноятии ВКД Тоҷикистон Шоҳрух Саидзода низ дар саҳифаи раёсати мазкур дар шабакаи иҷтимоии Facebook рад шудааст.
“Сардори Раёсати кофтукови ҷиноятии ВКД Тоҷикистон Саидзода Шоҳрух Абдуфаттоҳ дар беморхона бистарӣ нашудааст. Ба хотири эҳтиёт дар хонааш худро ҷудо нигоҳ медорад. Сабабаш шамолхӯрии маъмулӣ аст”, – қайд мешавад дар маълумот.
Бо нашри сурати Саидзода дар шароити хона аз одамон дархост шудааст, ки ба хабарҳои манбаъҳои беэътимод бовар накарда, мувофиқи имкон дар хона бимонанд.
Қобили зикр аст, ки қаблан чанде аз ВАО дар бораи бо аломатҳои сирояти коронавирус дар беморхона бистарӣ шудани Ҷамолиддин Нуралиев ва Шоҳрух Саидзода маълумот нашр карда буданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
