Дар Тоҷикистон аз 8 июл тағйирот ба Кодекси ҳуқуқвайронкунии маъмурӣ ва Кодекси ҷиноятӣ мавриди амал қарор гирифт, ки мувофиқи онҳо барои ниқоб надоштан ва паҳнкунии маълумоти носаҳеҳ ҷаримабандӣ ва барои паҳнкунии бемориҳои сироятӣ, аз ҷумла коронавирус ҷазои маҳрумият аз озодӣ пешбинӣ шудааст.
Тавре ба “Азия-Плюс” аз ВКД ҷумҳурӣ хабар доданд, лекин то 20 июл ҳеҷ касе мутобиқи ин тағйирот ба ҷавобгарӣ кашида нашудааст.
Кормандони мақомоти ҳифзи ҳуқуқ алҳол аз ҷаримабандӣ худдорӣ карда, танҳо бо суҳбатҳои фаҳмондадиҳӣ иктифо мекунанд.
“Аз ҷониби кормандони ҳифзи ҳуқуқ то ҳол касе вобаста бин масъала ба ҷавобгарӣ кашида нашудааст. Лекин мақомоти милитсия корҳои фаҳмондадиҳиро пурзӯр карданд. Агар шаҳрванд дидаву дониста дар бозор ё марказҳои савдо бе ниқоб гардад, бори аввал ӯро огоҳ мекунанд, вале агар қонуншиканӣ такрор гардад, онҳо ҷарима мешаванд”, – хабар дод ба “Азия-Плюс” котиби матбуотии ВКД Тоҷикистон Нусратулло Давлатзода.
Ӯ тавсия дод, ки агар касе дар ин маврид бе асос ҷарима шуда бошад, метавонад ба телефони боварии ВКД – 221 21 21 муроҷиат намояд.
Тағйирот ҳоло қонунӣ нест
Тавре ба “Азия-Плюс” як манбаъ аз Вазорати адлияи ҷумҳурӣ хабар дод, тағйроти зикршуда ҳоло мавриди амал қарор нагирифтааст, чунки пас аз қабул Вазорати тандурустӣ бояд ба онҳо шарҳу тавзеҳ пешниҳод мекард.
"То пешниҳоди шарҳу тавзеҳи расман тасдиқшудаи Вазорати тандурустӣ, кормандони мақомоти ҳифзи ҳуқуқ шахсони воқеӣ ва ҳуқуқиро ҷарима карда наметавонанд”, – қайд кард манбаъ дар Вазорати адлия.
Ба гуфтаи манбаъ, дар шарҳу тавзеҳи расмии Вазорати адлия бояд ҳатман маҳз дар куҷову кай ва дар кадом вақт ниқоб доштани одамон ва мушаххасан чӣ маъно доштани мафҳуми маълумоти носаҳеҳ фаҳмонида шавад.
Ёдрас мекунем, ки матни тағйироту иловаҳо ба Кодекси ҳуқуқвайронкунии маъмурӣ ва Кодекси ҷиноятии Тоҷикистон рӯзи 8 июл дар нашрияи ҳукумат – “Ҷумҳурият” нашр шуд.
Мувофиқи моддаи 2-и матни тағйирот, қонуни мазкур пас аз интишори расмӣ мавриди амал қарор дода мешавад.
Бино ба тағйирот, минбаъд барои ниқоб надоштан дар ҷойҳои ҷамъиятӣ шаҳрвандон ба маблағи аз 116 то 290 сомонӣ ҷарима шуда, барои паҳнкунии бемориҳои сироятӣ, аз ҷумла коронавирус шахс ба муҳлати аз 5 то 10 сол аз озодӣ маҳрум шуда метавонад.
Барои паҳнкунии маълумоти бардурӯғу носаҳеҳ дар бораи бемориҳои хатарноки сироятӣ, аз ҷумла коронавирус тариқи ВАО ва интернет ба маблағи аз 580 сомонӣ барои шахсони воқеӣ ва то 11 ҳазору 600 сомонӣ барои шахсони ҳуқуқӣ ҷарима пешбинӣ шудааст. Матни тағйирот бо ин суроға қобили дарёфт аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
