Яке аз кӯчаҳои маҳаллаи Истиқлоли шаҳри Бохтар ба номи Ҳасани Муродиён професори Донишгоҳи давлатии Бохтар, ки соле қабл фавтида буд, гузошта шуд.
Муовини раиси шаҳри Бохтар Наргис Қурбонзода ба “АП” хабар дод, ки қарор дар бораи ба номи Ҳасани Муродиён гузоштани яке аз кӯчаҳои шаҳр имрӯз дар ҷаласаи маҷлиси вакилони халқи шаҳр баррасӣ шуда, аз тарафи вакилон тасдиқ карда шуд.
“Мақомоти иҷроияи ҳокимияти давлатии шаҳри Бохтар хизматҳои шодравон Ҳасани Муродиёнро дар соҳаи маориф, илм ва адабиёт ба назар гирифта тасмим гирифт, ки ба хотири гироми дошти ин олими шинохта яке аз кӯчаҳои шаҳрро ба ном ӯ номгузорӣ кунад”,- гуфт Қурбонзода.
Ёдовар мешавем, ки Ҳасани Муродиён профессори Донишгоҳи Давлатии Бохтар 9 ноябри соли 2020 аз олам даргузашт. Эшон яке аз муқаққиқони пуркори риштаи адабиётшиносӣ дар Тоҷикистон буд.
Ҳасани Муродиён 20-уми сентябри соли 1958 дар деҳаи Навкорами ноҳияи Вахш, дар хонаводаи кишоварз ба дунё омада, 9-уми ноябри соли 2020 бар асари беморӣ аз олам чашм пӯшид.
Ҳасани Муродиён доктори илмҳои филологӣ, профессори Донишгоҳи Носири Хусрав буд. Марҳум аз худ 33 китоб ва садҳо мақолаҳои илмию публистӣ ба мерос гузоштааст. Ба гуфти наздиконаш 3 китоби дигар марҳум ҳанӯз нашр нашудаанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
