Имрӯз, 7 октябр сафари кории прзиденти Тоҷикистон Эмомалӣ Раҳмон ба вилояти Суғд оғоз шуд. Эмомалӣ Раҳмон аз шаҳру ноҳияҳои Хуҷанд, Бӯстон, Ҷаббор Расулов ва Бобоҷон Ғафуров дидан намуда, дар маросими кушодашавии чанд бинои ҷашнӣ иштирок мекунад.
Бино ба иттилои хадамоти матбуоти сарвари давлат, дар фурудгоҳи байналмиллалии Хуҷанд Эмомалӣ Раҳмонро раиси вилояти Суғд Раҷаббой Аҳмадзода ва фаъолони вилоят гарму самимӣ истиқбол гирифтанд.
Дар Фурудгоҳи байналмилалии Хуҷанд президенти мамлакат бинои толори вакилони расмии фурудгоҳро баъди навсозии куллӣ ва муҷаҳҳазгардонӣ ифтитоҳ намуд.
Бинои толори вакилони расмии фурудгоҳ дар масоҳати 810 метри мураббаъ навсозӣ карда шудаааст. Он дар солҳои 70-уми асри гузашта сохта шуда, то ба имрӯз таъмиру таҷдид карда нашуда буд.
Дар ин толор Эмомалӣ Раҳмон бо 100 нафар кӯдаки ятим аз шаҳру ноҳияҳои вилояти Суғд мулоқоти самимӣ ороста, ба ҳар яки онҳо туҳфаҳо – сару либос ва маблағи пулӣ тақдим кард.
Дар идома президент бинои нави аэровокзали фурудгоҳи байналмиллалии Хуҷандро расман ба истифода дод. Толори хизматрасонии пешазпарвозӣ ва қабули мусофирони бинои нави аэровокзал бо арзиши лоиҳавии зиёда аз 220 млн сомонӣ бунёду муҷаҳҳаз карда шудааст.
Ба истифода додани бинои нави аэровокзали фурудгоҳ имкон медиҳад, ки то ба 400-500 нафар мусофир дар қабулу гусел дар як вақт хизматрасонӣ карда шавад. Мутобиқи лоиҳа аз ду тарафи аэровокзал ба самти перрон ду галерея бо дарозии 22 метр ва 4 зинаи телескопӣ барои ҳавопоймоҳои калонҳаҷми тамғаҳои чун “Аэробус А320” ва “Боинг 767-300” васл карда мешавад.
Дар марҳилаи минбаъдаи татбиқи Лоиҳа муҷаҳҳазгардонии техникии бино бо тамоми таҷҳизоти техникии муосир, аз ҷумла таҷҳизот барои таъмини бехатарӣ, лифтҳои махсус барои мусофирони маъюб, эскалаторҳо ва дигар лавозимоти аэровокзал пешбинӣ гардидааст.
Сипас Эмомалӣ Раҳмон ба шаҳри Бӯстон раҳсипор гардида, ба фаъолияти корхонаи истеҳсоли шиферҳои асбестии ширкати “Ганҷофар” оғоз бахшид.
Дар шаҳри Бӯстон президент бинои муассисаи таълимии хусусии “Ворисони илм”-ро мавриди баҳрабардорӣ қарор дод. Мактаб бо ташаббуси оилаи Рауповҳо бо харҷи беш аз 5 млн сомонӣ бунёд гардидааст.
Пас аз ин сарвари давлат ба ноҳияи Бобоҷон Ғафуров ташриф оварда, бинои навбунёди Маркази саломатии деҳоти “Зарзамин” ва дар ҷамоати Хистеварзи ноҳияи Бобоҷон Ғафуров Мактаб-кӯдакистони “Маҳзани илм”-ро мавриди баҳрабардорӣ қарор дод.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
