Бонки миллии Тоҷикистон (БМТ) қурби расмии долларро нисбат ба асъори маҳаллӣ – сомонӣ якбора ба андозаи 15% боло бурд.
Мувофиқи қурби муқарранамудаи БМТ, имрӯз, 9 март 1 доллар 13 сомонӣ нарх дорад ва ин ҳам дар ҳолест, ки чанде пеш 1 доллар ба 11,30 сомонӣ баробар буд.
Бонки миллии Тоҷикистон ҳоло ба ҳеҷ гунае вазъ дар бозори асъорро шарҳ намедиҳад.
Ёдрас мекунем, ки қурби расмии доллар нисбат ба сомонӣ соли дуюм пас аз тасҳеҳи ахир рӯзи 4 ноябри соли 2020 бетағйир боқӣ монда буд.
Ҳамчунин Бонки миллӣ қурби расмии сомониро нисбат ба евро ба андозаи 14,9%: аз 12,3486 сомонии чанде пеш то ба 14,1908 сомонӣ ба имрӯз тағйир дод.
Қурби рубли Русия нисбат ба сомонӣ баръакс ба андозаи 8,5% боло рафта – аз 0,0910 сомонӣ барои 1 рубл рӯзи 8 март то ба 0,0995 сомонӣ барои имрӯз боло рафтааст.
Қобили зикр аст, ки беқурбшавии рубл дар Тоҷикистон бо оғози даргириҳои мусаллаҳона байни Русия ва Украина – аз 24 феврал шурӯъ шуд. Дар ин давра қурби расмии рубл нисбат ба сомонӣ ба андозаи 35,7% поин рафт.
Дар ҳамин ҳол, дар нуқтаҳои мубодилаи асъори бонкҳои тиҷоратӣ ҳафтаи дуюм аст, ки ин навъи асъори серталаб фурӯхта нашуда, лекин бо камоли майл қабул карда мешавад. Бонки миллӣ вазъияти мавҷударо дар бозори асъори нақд ҳоло шарҳ надодааст.
Мутахассиси яке аз бонкҳои низомсози ҷумҳурӣ бидуни ифшои ному насаб ҳафтаи гузашта ба “Азия-Плюс” дар ин робита эътироф карда буд, ки дар бораи манъи фурӯши асъор дастури шифоҳӣ мавҷуд аст.
Ӯ зикр кард, ки бар асари даргирӣ дар Украина ва таҳримҳои кишварҳои ғарбӣ, вазъи молиявӣ ва иқтисодӣ дар Русия, ки ҳиссаи зиёди асъор аз ин кишвар ба мо ворид мегардад, рӯз то рӯз мушкил мешавад.
“Бинобар ин ба бонкҳо пешниҳод шудааст, ки асъорро сарфа кунанд, то ки барои бо маблағ таъмин кардани воридкунанагони молу маҳсулот имкон дошта бошанд”, – изҳор дошта буд ҳамсуҳбати мо.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
