Рамазон Раҳимзода, вазири корҳои дохилии Тоҷикистон гуфт, то имрӯз тахминан 100 шаҳрванди Тоҷикистон, ки дар зиндонҳои Русия адои ҷазо мекарданд, ба ҷанги Украина фиристода шуданд.
Ӯ, ки имрӯз, 11-уми август, дар назди рӯзноманигорон суҳбат мекард, омори мушаххас дар ин бора пешниҳод накард ва танҳо баъди пойфишории рӯзноманигорон дар бораи ироаи теъдоди тоҷикони аз зиндони Русия ба ҷанги Украина фиристодашуда, гуфт, “тақрибан 100 нафар ҳастанд”.
Вазир афзуд, ҳамтоёни русаш чунин оморро ба онҳо пешниҳод намекунанд ва дар созишномае, ки онҳо ба имзо расонидаанд, табодули чунин маълумот дарҷ нашудааст.
Ин бори аввал аст, ки як мақомдори баландпояи Тоҷикистон дар бораи тоҷикони аз зиндони Русия ба ҷанги Украина фиристодашуда иттилои тахминӣ пешниҳод мекунанд.
ИЗОБРАЖЕНИЕ Рамазон Раҳимзода
Қаблан, ҳеҷ ниҳоде дар ин бора омори мушаххас пешниҳод намекард. Аз ҷумла, аввали ҳафтаи равон Музаффар Ашуриён, вазири адлияи Тоҷикистон гуфта буд, ки чунин орморро надорад.
То ҳол расонаҳо номи қариб 20 шаҳрванди Тоҷикистонро ошкор кардаанд, ки аз зиндонҳои Русия ба ҷанги Украина рафта ва кушта шудаанд.
Ёдовар мешавем, ки Русия пас аз оғози ҷанг дар Украина ба таҷриҷ ба нерӯ эҳтиёҷ пайдо карда ва дар пайи ин ба ҷалби шаҳрвандони хориҷӣ ва зиндониён ба артиш шурӯъ намуд. Аз ҷумла, ба Ширкати ҳарбии хусусии “Вагнер” иҷоза дод, ки аз дилхоҳ зиндони Русия маҳбусонро бо ваъдаи авф ва маблағти зиёд ба ҷанг ҷалб кунад.
Дар пайи ин, хабарҳо оид ба ҷалби иҷбории баъзе маҳбусон ба ҷанги Украина низ нашр гардиданд. Мақомоти расмии Русия ин хабарҳоро шарҳ намедиҳанд.
