Дар мусобиқаи байналмилалии “Zagreb Grand Prix 2023” оид ба гӯштини ҷудо, ки аз 18 то 20-уми август дар Хорватия баргузор мешавад, Тоҷикистонро 5 варзишгар муаррифӣ мекунанд. Дар ин бора аз Федератсияи ҷудои Тоҷикистон хабар доданд.
Манбаъ гуфт, дар ин мусобиқа Муҳаммадсолеҳ Қувватов ва Меҳрзод Суфиев дар вазни то 60кг, Обид Ҷебов дар вазни то 66 кг, Маҳмадшариф Наҷмиддинов дар вазни то 73 кг ва Ҷаҳонгир Маҷидов дар вазни то 90 кг ширкат хоҳанд кард.
Маросими қуръакашии Мусобиқаи байналмилалии “Zagreb Grand Prix 2023” оид ба гӯштини ҷудо 17 август доир мешавад ва он аз рӯи ҳафт вазн миёни мардон ва ҳафт вазн байни занон сурат мегирад.
Сомонаи расмии Федератсияи байналмилалии ҷудо (IJF) хабар медиҳад, ки дар рӯзи аввали мусобиқот – 18-уми август – қувваозмоиҳо дар вазнҳои -60 кг, -66 кг миёни мардон ва -48 кг, -52 кг, -57 кг миёни занон баргузор мешавад.
Рӯзи дувуми мусобиқа – 19-уми август – ҷудокорони вазнҳои -73 кг, -81 кг байни мардон ва -63 кг, -70 кг миёни занон рақобат мекунанд.
Рӯзи 20-уми август дар вазнҳои сангин -90 кг, -100 кг, +100 кг миёни мардон ва -78 кг, +78 кг байни занон баргузор мешавад.
Ба иттилои манбаъ, дар мусобиқа 561 ҷудочӣ- 339 мард ва 222 зан аз 88 давлати дунё барои ба даст овардани нишонҳои фахрӣ қувваозмоӣ менамоянд.
Ба ғолибони мусобиқа, дар баробари медал, мукофоти пулӣ низ тақдим мегардад. Дар ҳар як вазн ба ғолиб 3000 евро, барои ҷойи дувум 2000 евро ва барои ҷойҳои севум 1000-евроӣ супурда хоҳад шуд.
