Қурбон Сӯфиев, як захмии дигари садамаи нақлиётии шаҳри Кӯлоб пас аз ду рӯзи ҳодиса дар бемористон ҷон бохт. Ҳамин тавр, теъдоди фавтидагон ба 12 нафар расид. Дар ин бора рӯзи 14-уми август шаҳрдори Кӯлоб Бахтиёр Назарзода зимни нишасти матбуотӣ хабар дод.
Ба гуфтаи ӯ, Қурбон Сӯфиев 29 сол дошта, дар пайи ин ҳодиса ҷароҳати вазнин бардоштааст ва то ахир вазъи саломатиаш ваҳим гуфта мешуд.
“Дар садамаи нақлиётии шаби 6-уми август 10 нафар фавтида ва 13 нафар дигар ҷароҳат бардошта, дар беморхонаи шаҳрию вилоятӣ бистарӣ шуданд. Баъди як рӯзи ҳодиса Мадинаи Ҷамолиддин ва рӯзи дуюм Қурбон Сӯфиев дар беморхона ҷон доданд. Теъдоди фавтидагон 12 нафар шуд”, – шарҳ дод шаҳрдори Кӯлоб.
Бахтиёр Назарзода афзуд, ки “овозаҳое паҳн кардаанд, ки гӯё теъдоди фавтидагон хеле зиёд бошад, вале онҳо асоси воқеӣ надоранд”.
Ёдовар мешавем, ки шоми 6-уми август ронандаи мошини боркаши “Дулан” ҳангоми ҳаракат дар шоҳроҳи “Душанбе-Кӯлоб-Хоруғ” аз ҳудуди ноҳияи Ш.Шоҳин, дар даромадгоҳи шаҳри Кӯлоб бар асари корношоямии тормоз мошинро идора карда натавониста ва дар натиҷа бо суръати баланд ба мошинҳои дигар ва хонаҳое, ки дар канори роҳ ҷойгир аст, бархӯрд.
Ронандаи дар ҷойи ҳодиса ба ҳалокат расидааст. Гузориши муфассали “Азия-Плюс”-ро дар ин ҷо хонед.
