Имрӯз, 28 август соати 09:35 дақиқа бо вақти Душанбе дар қаламрави Тоҷикистон заминларза рух дод.
Дар Хадамоти геофизикии Академияи миллии илмҳои Тоҷикистон ба “Азия-Плюс” хабар доданд, ки маркази заминларза дар 243 километрии ҷанубу шарқи шаҳри Душанбе дар қаламрави Афғонистон воқеъ будааст.
Ба иттилои манбаъ, қувваи заминларза дар марказаш 4 балл ва дар шаҳри Душанбе – 2-3 баллро ташкил додааст.
Дар бораи осебдидагон ва харобиҳо бар асари ин заминларза дар Тоҷикистон ҳоло хабаре нарасидааст.
Дар ҳамин ҳол, ба иттилои маркази ҷумҳуриявии мониторинги пешгӯии заминларзаи Вазорати ҳолатҳои фавқулодаи Ӯзбекистон, дар марказ дар чуқурии 200 км қувваи ин заминларза 5,4 баллро ташкил додааст.
