Тими миллии Тоҷикистон, ки бори аввал дар Ҷоми Осиё оид ба футбол иштирок мекунад, пас аз ғалаба бар тими Лубнон ба марҳилаи 1/8 ниҳоӣ роҳ ёфт.
Ин пирӯзии таърихӣ ба мухлисони футболи тоҷик шодиву нишоти беҳад овард. Дар ин робита, мо бо сокинону меҳмонони пойтахт оид ба таассурот ва интизориҳояшон аз бозии футболбозони тоҷик суҳбат оростем.
Дар суҳбати мо бештар ба голҳои бекоршуда, доварӣ ва вохӯрии футболбозон бо президент таваҷҷуҳ зоҳир шуд. Ба ақидаи аксари сокинон, бозӣ бисёр ҷолиб буд ва тими мо футболи олиро намоиш дод.
Чандеи дигар баён доштанд, ки ба рӯҳияи футболбозони тоҷик, бешубҳа, вохӯрӣ бо президенти кишвар пеш аз бозӣ таъсир гузошт.
Умеду интизорӣ аз тими миллӣ бошад, аз ҳама як аст – ғалаба!
Муфассал дар навори зер тамошо кунед.
Чанде пеш баъди бозиҳои навбатӣ дар гурӯҳҳо, рақиби дастаи мунтахаби футболи Тоҷикистон дар даври 1/8 финалӣ (плей-офф) маълум шуд. Дар ин марҳила футболбозони тоҷик бо тими Амороти Муттаҳидаи Араб (АМА) бозӣ мекунанд.
Ин бозӣ рӯзи 28-уми январ, соати 21:00 ба вақти Душанбе баргузор мегардад.
