Дар ноҳияи Рӯдакӣ бар асари садамаи нақлиёт 3 нафар ҳалок шуданд. Дар ин бора дар сомонаи ВКД-и ҷумҳурӣ хабар дода мешавад.
“Нимаи дуюми рӯзи 5 феврал ронандаи автомашинаи тамғаи Opel Astra Ғолибҷон Тағоймуродови 29-сола ҳангоми ҳаракат аз ноҳияи Рӯдакӣ ба самти ноҳияи Ёвон аз уҳдаи идораи воситаи нақлиёт набаромада, он ба девори ҳимоявии канори роҳ бармехӯрад”, – омадааст дар хабари Вазорат.
Ба иттилои манбаъ, дар натиҷа ронанда ва се мусофир ҳамсоли ӯ – Шерхон Тешаев, Маҳмадраҷаб Чориев, Нуралӣ Тағойбеков, инчунин Абдукарим Тешаеви 21-сола бо ҷароҳатҳои вазнин дар беморхона бистарӣ мешаванд.
Гуфта мешавад, баъдан дар бемористон ронанда ва ду мусофири он – Шерхон Тешаев ва Маҳмадраҷаб Чориев ба ҳалокат мерасанд.
Зимнан зикр мегардад, ки аз рӯи ҳодисаи мазкур таҳқиқот идома дорад.
