Китоби нави Холиқназар Ҷумъазода, рӯзноманигор ва адиби ҳаҷвнавис зери унвони “Хандасарой” аз чоп баромад, ки фарогири латифаву шӯхиҳо ва хотираҳои шавқовари нависанда аз пирони зодгоҳаш аст.
Муаллифи китоб ангезаи иншои асарро дар суӯбат ба “Asia-Plus” шикастани ташнагии дӯстдорони ҳаҷв номид.
“Бо пешкаш намудани китоби “Хандасарой” барои шикастани ташнагии дӯстдорони ҳаҷв “ретсепт”-и нав пешниҳод мекунам ва боварӣ дорам, ки бо ин тарзи табобат зиндагии дӯстдорони ханда хушу умрашон боз ҳам дарозтар мешавад”, – иброз дошт ӯ.
Бояд гуфт, ки Холиқназар Ҷумъазода аъзои Иттифоқҳои журналистон ва нависандагони Тоҷикистон буда, эҷодиёти ӯро асосан лутфу ҳозирҷавобии дӯстон ва шахсиятҳои шинохта, хушгӯиҳои одамони шӯху ҳозирҷавоб, муносибати ҷолиби устоди шогирд ва дигар танзу шӯхиҳо ташкил медиҳанд.
ИЗОБРАЖЕНИЕ
Ёдовар мешавем, ки қаблан китобҳои дигари Холиқназар Ҷумъазода, бо номҳои “Парандаҳои муҳоҷир” (соли 2013), “Биё, ки фолат бинам” (2021) ва “Ашкҳои зери борон” (2022) нашр гардида буданд.
Соли 2021 китоби ҳаҷвии “Биё, ки фолат бинам”-и ин нависанда дар озмуни “Китоби сол”, ки аз тарафи Вазорати фарҳанги Тоҷикистон баргузор мегардад, дар номинатсияи наср китоби сол эълон шуда буд.
