Варзишгарони тоҷик дар Бозиҳои XVII паралимпӣ, ки аз 28-уми август то 8-уми сентябр дар Порис баргузор мешаванд, ширкат намекунанд.
Дар ин бора ба “Азия-Плюс” Абдурауф Алимов, раиси Кумитаи паралимпии Тоҷикистон хабар дод. Ба гуфтаи ӯ, ягон нафар аз Тоҷикистон барои ширкат дар ин мусобиқа роҳхат ба даст наовардааст.
Бояд гуфт, ки Бозиҳои паралимпӣ мусобиқаи байналмилалӣ барои маъюбон мебошад, ки ҳар чаҳор сол пас аз Бозиҳои олимпӣ баргузор мешавад.
“Ин мусобиқа барои паралимпиҳои тоҷик хеле муҳим аст, аммо дар давраи интихобии гузашта ҳеҷ яке аз онҳо натавонистанд меъёри зарурии ширкат дар Паралимпиадаи Парижро иҷро кунанд”, – гуфт Алимов.
Барои ба даст овардани роҳхат ба Бозиҳои паралимпии соли 2024, ба варзишгарони мо ишғол кардани мавқеъҳои муайян дар рейтингҳои ҷаҳонӣ муҳим буд. Барои ин ба варзишгарон лозим буд, ки дар марҳилаи интихобии мусобиқоти ҷаҳонӣ ширкат варзида, барои рейтинг хол ба даст оваранд.
“Теъдоди чунин мусобиқаҳо барои варзишгарон аз Тоҷикистон кам буд, аз ин рӯ дарёфти муҷаввиз имкон надошт. Ҳамчунин, ба далели набуди манобеъи молӣ варзишгарони тоҷик натавонистанд дар бисёре аз мусобиқоти муҳим ширкат кунанд”, – афзуд ӯ.
Бояд гуфт, ки Тоҷикистон бори нахуст дар соли 2004 – дар Афина дар Бозиҳои паралимпӣ ширкат карда буд. Варзишгарон аз Тоҷикистон то имрӯз аз Бозиҳои паралимпӣ ягон медал ба даст наовардаанд.
