Дар доираи сафари кории сарвазири Тоҷикистон Қоҳир Расулзода ба вилояти Хатлон ҳудуди 20 иншоот мавриди баҳрабардорӣ қарор гирифт, ки аксарияти онҳо ба соҳаи маориф мансубанд. Дар ин бора ба “Азия-Плюс” аз хадамоти матбуоти раиси вилоят хабар доданд.
Дар доираи сафар сарвазири ҷумҳурӣ аз ноҳияҳои Темурмалик, Восеъ, Шамсиддини Шоҳин ва шаҳри Кӯлоб боздид намуд.
Дар ноҳияи Темурмалик бо иштироки сарвазир биноҳои таълимии иловагӣ дар мактабҳои деҳоти Фалхобод ва Чилчаҳ, инчунин бинои шуъбаи маорифи ноҳия ба истифода дода шуданд.
Ғайр аз ин, кӯдакистон бо шароити муосир ва бинои сардхона бо ғунҷоиши 500 тонна бору маҳсулот боз шуд.
Ҳамчунин Қоҳир Расулзода дар ноҳияи Темурмалик бо рафти корҳои сохтмон ва соҳилмустаҳкамкунӣ шинос шуд. Ба шахсони масъул ҷиҳати тақвияти корҳои соҳилмустаҳкамкунӣ ва истифодаи самараноки масолеҳи сохтмон дастуру супоришҳо дода шуд.
Дар деҳаи Ҳулбуки ҷамоати деҳоти ба номи Миралӣ Маҳмадалиев дар ноҳияи Восеъ бини иловагии мактаби №4 боз шуд. Бино аз 10 синфхонаи таълимӣ иборат буда, барои таҳсили 480 хонанда дар ду баст пешбинӣ шудааст.
Дар маркази ноҳияи Шамсиддини Шоҳин муҷассамаи шоир ва мутафаккири маъруфи тоҷик Шамсиддини Шоҳин қомат афрохт. Ғайр аз ин, дар ин ҷо гулгашти муосир боз шуд, ки акнун барои сокинони маҳаллӣ минтақаи нави фароғату истироҳат хоҳад шуд.
Ҳамчунин дар ин ҷо биноҳои маъмурӣ, аз ҷумла Маркази ҷавонон ва бинои шуъбаи маорифи ноҳия мавриди истифода қарор гирифтанд.
Дар шаҳри Кӯлоб бо ҳузури сарвазир бинои мактаби №41 боз шуд. Дар ин ҷо ба сарвазир лоиҳаи рақамисозии соҳаи маориф, ки то соли 2040 амалӣ мегардад, муаррифӣ шуд.
