Субҳи имрӯз, 28-уми ноябр, Эмомалӣ Раҳмон, раиси ҷумҳури Тоҷикистон барои иштирок дар ҳамоиши навбатии Шурои амнияти дастҷамъии Созмони Аҳдномаи амнияти дастҷамъӣ (СААД) ба шаҳри Остонаи Қазоқистон сафар кард.
Дар ин бора дафтари матбуоти раиси ҷумҳур иттилоъ медиҳад.
Ба навиштаи ин ниҳод, Эмомалӣ Раҳмонро дар ин сафар вазири корҳои хориҷӣ, ёрдамчии раиси ҷумҳур оид ба масъалаҳои робитаҳои хориҷӣ, вазири мудофиа, котиби Шӯрои амният ва дигар шахсони расмӣ ҳамроҳӣ мекунанд.
Ҳамоиши навбатии Шурои амнияти дастҷамъии Созмони Аҳдномаи амнияти дастҷамъӣ имрӯз, 28-уми ноябр, дар шаҳри Остона баргузор мешавад. Дар он роҳбарони панҷ кишвари аъзои СААД -Қазоқистон, Русия, Қирғизистон, Тоҷикистон ва Беларус барои муҳокимаи масъалаҳои муҳими амниятӣ иштирок мекунанд.
Арманистон, шашумин кишвари аъзои ин паймон пештар эълом карда буд, ки узвияти худро боздошта, нақша дорад паймонро тарк кунад. Роҳбарияти ин кишвар иддао доранд, ки СААД дар муноқишаи Арманистон бо Озарбойҷон аз мавқеи онҳо ба таври зарурӣ ҳимоят накард.
Таҳкими сарҳади Тоҷикистон бо Афғонистон низ аз ҷумлаи масоили баррасишавандаи ин ҳамоиш мебошад.
Ҳамчунин, сарони давлатҳои аъзо омодагӣ ба таҷлили ҷашни 80-солагии Ғалаба дар Ҷанги Бузурги Ватаниро баррасӣ хоҳанд кард.
Соли оянда раёсати СААД ба зиммаи Қирғизистон вогузор мешавад ва дар назар аст, дар ҳамоиши Остона ин кишвар нақшаву барномаҳояшро муаррифӣ намояд.
